جون کی فلکیاتی صورت حال اور آمدِ رمضان المبارک

حالات کو نیا رُخ دینے والا مہینہ، ماہِ مقدس کے لیے ضروری اعمال و وظائف

جون کے آغاز ہی سے مقدس و مبارک ماہ رمضان کا آغاز ہورہا ہے، ہم ہر سال اس موقع پر عام انسانی مسائل کو مدنظر رکھتے ہوئے نہایت مفید اور مجرب عملیات لکھتے رہے ہیں جن سے ہر سال بے شمار لوگ فیض حاصل کرتے ہیں،اس بار بھی اس روایت کو برقرار رکھتے ہوئے چند وظائف و عمل پیش کر رہے ہیں لیکن حسب روایت جون کی فلکیاتی صورت حال کا بھی جائزہ لینا ضروری ہے۔

جون کے ستارے

سیارہ شمس برج جوزا میں حرکت کررہا ہے اور 21 جون کو برج سرطان میں داخل ہوجائے گا، سیارہ عطارد برج ثور میں ہے اور 13 جون کو اپنے ذاتی برج جوزا میں داخل ہوگا، سیارہ زہرہ شمس کی قربت کے سبب غروب ہے اور برج جوزا میں حرکت کر رہا ہے، 18 جون کو اپنے ذاتی برج سرطان میں داخل ہوگا، سیارہ مریخ بحالتِ رجعت برج عقرب میں حرکت کر رہا ہے اور 30 جون کو مستقیم ہوگا، سیارہ مشتری استقامت کے بعد اپنی سیدھی چال پر برج سنبلہ میں حرکت کر رہا ہے جب کہ سیارہ زحل بحالت رجعت برج قوس میں ہے، سیارہ یورینس برج حمل میں، نیپچون برج حوت میں حرکت کر رہا ہے،14 جون سے اسے رجعت ہوجائے گی جو 20 نومبر تک جاری رہے گی،سیارہ پلوٹو بحالتِ رجعت برج جدی میں ہے جب کہ راس اور ذنب بالترتیب برج سنبلہ اور حوت میں حرکت کر رہے ہیں۔

مئی کا مہینہ خاصا سخت اور نئے حادثات اور چیلنج لانے والا مہینہ تھا، اسی مہینے میں امریکا نے طالبان امیر مُلّا منصور پر حملہ کیا، اسی مہینے میں ایران، افغانستان اور بھارت کے درمیان اہم معاہدات طے پائے جو پاکستان کے لیے ایک نیا چیلنج ہے،پاناما لیکس اسکینڈل بھی اس مہینے میں نمایاں رہا ہے اور اب ایک نئے مرحلے میں داخل ہورہا ہے، تمام فریقین مذاکرات کی ٹیبل پر آگئے ہیں، ایک طرف حکومت کی ٹیم ہے تو دوسری طرف متحدہ اپوزیشن کے ارکان ہیں، ان میں سے جے یو آئی ، اے این پی اور ایم کیو ایم کا معاملہ عجیب ہے ، جے یو آئی حقیقتاً حکومت کی اتحادی پارٹی ہے ، اے این پی کو بھی اس مسئلے سے کوئی خاص دلچسپی نہیں ہے اور یہی صورت حال ایم کیو ایم کی ہے، اس طرح دوسری جانب یعنی اپوزیشن نے شامل تین ممبران کو محض ”شامل باجا“ کے طور پر شامل کرلیا گیا ہے، اگر کسی اہم معاملے کا فیصلہ اکثریتی بنیاد پر کرنا پڑا تو اس کا فائدہ بھی حکومت کو ہوگا جس کے تین ووٹ اپوزیشن میں بھی موجود ہوں گے، اپوزیشن کی دوسری بڑی پارٹی پیپلز پارٹی ہے ، جس کا حال آج کل عجیب ہوچکا ہے، ایک ہی پارٹی کے دو چیئرمین اور دو جنرل سیکریٹری مقرر ہیں، آدھی پارٹی وزیراعظم سے مستعفی ہونے کا مطالبہ کر رہی ہے اور آدھی جمہوریت کو بچانے کی فکر میں ہے ۔

 جون کا مہینہ بھی کسی طور بھی سادہ اور آسان نہیں ہے، اس مہینے میں اول تو مقابلے کے سخت نظرات زیادہ ہیں،دوم یہ کہ اس سال دوسری بار سیارہ مشتری راہو کیتو محور میں آگیا ہے اور یہ صورت حال تقریباً 14 جولائی تک قائم رہے گی، اس کے نتیجے میں ایک بار پھر دنیا بھر میں مالیاتی سیکٹر متاثر ہوگا، مذہبی سیاست میں شدت پسندی کا عنصر بڑھے گا، بینکوں ، اسٹاک مارکیٹوں اور آئل کے شعبے میں اُتار چڑھاو ¿ پیدا ہوگا، پاکستان اور انڈیا کے زائچوں کے مطابق بھی حالات کی سختی اور نئے چیلنجز کا امکان ہے، جون کے مہینے میں بجٹ کی بھی آمد آمد ہے اور ممکن ہے آنے والا بجٹ عوام کی تکالیف اور پریشانیوں میں مزید اضافے کا باعث بن جائے۔

نظرات و اثراتِ سیارگان

جون کے مہینے میں جیسا کہ پہلے عرض کیا ہے کہ نحس اثراتِ سیارگان زیادہ ہیں، 5 مقابلے، 4 تربیعات انتہائی سخت اور نحس اثرات کے حامل ہیں، ایک قران اور صرف 2 تثلیثات اور 3 تسدیسات قائم ہوں گی جن کی تفصیل ذیل میں دی جارہی ہے۔

2 جون: شمس اور نیپچون کے درمیان تربیع کا نحس زاویہ صاحب حیثیت و اختیار افراد کے لیے منحوس اثر رکھتا ہے،اس نظر کے اثر سے بعض لوگ اپنے مقام و مرتبے سے محروم ہوسکتے ہیں، عام لوگوں کو اس دوران میں صاحب حیثیت و اختیار افراد سے کوئی مدد نہیں ملے گی، ان سے دور رہنا بہتر ہوگا۔

3 جون: شمس اور زحل کے درمیان مقابلے کا زاویہ بھی صاحب حیثیت و اختیار افراد خصوصاً صاحب اقتدار افراد کے لیے نہایت منحوس اثر رکھتا ہے،عام افراد کے لیے یہ وقت اعلیٰ افسران و حکام کی جانب سے عدم تعاون اور سخت رویہ سامنے لائے گا، اسی روز زہرہ اور نیپچون کے درمیان تربیع کا زاویہ بھی ہے،یہ بھی نحس اثر رکھتا ہے،خصوصاً خواتین کو اس دوران میں محتاط رہنے کی ضرورت ہوگی، کسی فریب میں آنے کا امکان ہوگا، خواتین سے متعلق جرائم کی شرح میں اضافہ ہوگا۔

 4جون: زہرہ اور زحل کے درمیان مقابلے کی نحس نظر خواتین سے باہمی تعلقات میں مشکلات لاسکتی ہے،ملکی معاملات میں یہ وقت شو بزنس اور اس سے متعلقہ خواتین کے لیے مشکل ثابت ہوسکتا ہے،عام افراد کی ازدواجی زندگی میں تناو ¿ اور ٹینشن پیدا ہوسکتا ہے۔اسی روز شمس اور مشتری کے درمیان اسکوائر کا زاویہ ہوگا، ملکی سطح پر یہ زاویہ قانونی اور آئینی معاملات میں حکومت کی من مانی اور ناجائز قوانین کی نشان دہی کرتا ہے، مزید ٹیکس اور بجٹ میں ایسے معاملات سامنے آسکتے ہیں جو عام آدمی کی زندگی میں مشکلات پیدا کرسکتے ہیں۔

7 جون: زہرہ اور شمس کے درمیان قران کا زاویہ اس اعتبار سے اچھا اثر نہیں رکھتا کہ زہرہ شمس کی قربت سے تحت الشعاع (Combust) ہوکر اپنی قوت کھودیتا ہے،زہرہ کی یہ کمزوری ازدواجی خوشیوں ، محبت ، دوستی، منگنی و نکاح وغیرہ کے معاملات کے لیے اچھی نہیں سمجھی جاتی،تقریباً 13 جولائی تک زہرہ غروب رہے گا، اس تمام عرصے میں مندرجہ بالا تمام اُمور میں موافقت اور بہتر نتائج کی امید نہیں کی جاسکتی۔

09 جون: عطارد اور مریخ کے درمیان مقابلے کی نظر ہے،ایک نہایت سخت زاویہ ہے جو پرنٹ اور الیکٹرانک میڈیا کے لیے نئے چیلنج سامنے لائے گا، میڈیا پر اصول و قواعد کی پابندی کے لیے سخت دباو ¿ پڑسکتا ہے اور خلاف ورزی کی صورت میں عتاب بھی نازل ہوسکتا ہے،عام افراد کی زندگی میں یہ زاویہ ان کے انفرادی زائچے کی بنیاد پر اچھے یا برے اثرات دے گا۔

12 جون: زہرہ اور یورینس کے درمیان تسدیس کا زاویہ سعد اثر رکھتا ہے لیکن زہرہ کے غروب ہونے کی وجہ سے یہ زاویہ پہلی نظر کی محبت میں توقع کے خلاف نتائج دے گا، مرد و خواتین دونوں کو اس دوران میں قائم ہونے والے تعلقات میں زیادہ خوش گمان نہیں ہونا چاہیے، یہ عارضی نوعیت کے ہوسکتے ہیں، اس عرصے میں خواتین سے تعلقات یا رشتے کوئی چونکا دینے والی نئی کروٹ سامنے لاسکتے ہیں۔

14 جون: شمس اور یورینس کے درمیان تسدیس کا سعد زاویہ حکومت کی جانب سے مثبت رویے اور اقدام کی نشان دہی کرتا ہے،عام آدمی کے لیے اس وقت افسران بالا یا اعلیٰ حکام سے مددوتعاون حاصل کرنے میں مدد ملے گی۔

20 جون: عطارد اور زحل کے درمیان مقابلے کا نحس زاویہ میڈیا سے متعلق اداروں یا افراد پر دباو ¿ یا پابندی لاسکتا ہے،تحریری معاہدات اور خصوصاً پراپرٹی سے متعلق دستاویزات کی تیاری میں محتاط رہنے کی ضرورت ہوگی، کوئی غلطی یا کوتاہی مستقبل میں مسئلہ بن سکتی ہے،اسی تاریخ کو عطارد اور نیپچون کے درمیان تربیع کی نظر بھی تحریری غلطیوں ، غلط فیصلوں یا اقدام کی نشان دہی کر رہی ہے۔

23 جون: عطارد اور مشتری کے درمیان تربیع کا زاویہ نحس اثر رکھتا ہے،کاروباری سیکٹر میں سرد بازاری دیکھنے میں آئے گی، سفر اور تعلیمی نوعیت کی سرگرمیوں میں التوا یا رکاوٹوں کا سامنا ہوسکتا ہے۔

26 جون: مشتری اور پلوٹو کے درمیان تثلیث کا سعد زاویہ عام لوگوں کی زندگی پر فوری طور سے کوئی خاص اثر نہیں ڈالتا، ایسے زاویے طویل المیعاد دنیاوی معاملات میں نئی تبدیلیوں کی بنیاد رکھتے ہیں اور یہ تبدیلیاں لاءاینڈ آرڈر سے متعلق ہوسکتی ہیں،بین الاقوامی سطح پر نئے قوانین کے بارے میں غوروفکر کا آغاز ہوسکتا ہے۔

27 جون: عطارد اور یورینس کے درمیان تسدیس کی سعد نظر ہوگی جو میڈیا ، ذرائع نقل و حمل، الیکٹرونکس ، انٹرنیٹ وغیرہ سے متعلق معاملات میں مثبت اور خوش گوار تبدیلیوں کی نشان دہی کرتی ہے،اس وقت غیر روایتی طریقوں سے کام لے کر اور نئے آئیڈیاز پر پیش قدمی کرکے فوائد حاصل کیے جاسکتے ہیں، اسی طرح کو زہرہ اور نیپچون کے درمیان تثلیث کا سعد زاویہ ہوگا جو محبت و دوستی یا ازدواجی زندگی کے پیچیدہ مسائل کو حل کرنے میں معاون و مددگار ثابت ہوسکتا ہے۔

30 جون: زہرہ اور پلوٹو کے درمیان مقابلے کی نظر اگرچہ 30 جون سے شروع ہوجائے گی لیکن مکمل نظر یکم جون کو ہوگی،یہ نظر عورت و مرد کے تعلقات میں حدود سے تجاوز لاتی ہے،محبت اور دوستی کے معاملات میں خواتین کو محتاط رہنے کی ضرورت ہوگی،خواتین سے زیادتی کے واقعات بھی اس عرصے میں زیادہ ہوتے ہیں۔

شرف قمر 

پاکستان اسٹینڈر ٹائم کے مطابق قمر اپنے درجہ ءشرف پر 2 جون 11:03 am سے 12:39 pm تک ہوگا، جب کہ نیو یارک ٹائم کے مطابق 2 جون کو 01:03 am سے 02:39 am تک ہوگا۔

قمر در عقرب

پاکستان اسٹینڈر ٹائم کے مطابق قمر اپنی ہبوط کے درجے پر 15 جون رات 10:24 pm سے 12:25 am تک رہے گا، جب کہ نیویارک ٹائم کے مطابق 12:24 pm سے 02:25 pm تک رہے گا،اس بار شرف قمر اور قمر در عقرب کے اعمال نہیں دیے جارہے، ضرورت مند پرانے کالموں سے استفادہ کرسکتے ہیں۔

رویت ہلال رمضان المبارک

 رمضان المبارک کا چاند دیکھ کر فوری طور پر تین مرتبہ اللہ اکبر کہنا اور 7 بار سورہ فاتحہ پڑھ کر دعا کرنا ایک مفید اور افضل عمل ہے ۔ اگر آپ نے اس وقت کوئی انگوٹھی کسی نگینے یا نقش کی پہنی ہوئی ہے تو اس پر بھی دم کریں۔ اس طرح اس کی تاثیر میں اضافہ ہوجائے گا ، اگر آپ کے پاس کوئی لوح یا نقش وغیرہ ہے تو اس پر بھی دم کرلیں ۔ 

ایک نادر عمل رویت ہلال

اگر آپ چاہتے ہیں کہ آپ کا پورا سال حفظ و امان اور کامیابی اور خوش حالی کے ساتھ عزت و احترام کے ساتھ گزرے تو اس کے لیے یہاں ہم ایک مختصر سا بہت آسان عمل لکھ رہے ہیں۔ یہ عمل گزشتہ سال بھی دیا گیا تھا اور بے شمار لوگ اس سے ہر سال فائدہ اٹھاتے ہیں ۔

 رمضان کا چاند دیکھ کر اپنا بنیادی مطلب اور مقصد دل میں رکھتے ہوئے 7 بار مندرجہ ذیل اسما کا ورد کریں اور پھر اپنے مقصد کے لیے دعا مانگیں۔

یا اِسرافِیلُ یا مِیکائیلُ یا سَتَّارُ یا غَفَّارُ

یہ عمل چاند دیکھنے کے بعد سات دن تک روزانہ کریں اور کوئی ناغہ نہ کریں۔ انشاءاللہ آپ کا مطلب و مقصد پورا ہوگا اور خیر و برکت کے دروازے کھل جائیں گے۔

 اس کے بعد ہر مہینے نیا چاند دیکھ کر اسی عمل کو دہراتے رہیں یعنی نیا چاند دیکھنے کے بعد ہر ماہ سات روز تک یہ عمل کرتے رہیں تو اس طرح آئندہ سال دوسرے رمضان کے چاند تک اس عمل کا چلّہ پورا ہوجاتا ہے اور پھر اس عمل کی برکت سے زندگی بدل جاتی ہے۔ وہ لوگ اس عمل کو ضرور کریں جو طویل عرصے سے گو ناگوں مسائل کا شکار ہیں اور سمجھتے ہیں کہ ان کی زندگی نامرادی اور ناکامی میں گزر رہی ہے۔ انشاءاللہ ایک سال بعد وہ اپنی زندگی کو بدلا ہوا پائیں گے۔ 

ایام بیض اور دعائے مُجِیر

رمضان المبارک کی تیرہ ، چودہ اور پندرہ تاریخ کو ایام بیض کہا جاتا ہے۔ ان تاریخوں میں اگر دعائے مجیر پڑھ لی جائے تو جملہ گناہوں کی معافی ، تمام آفات سے تحفظ ، قرضے سے نجات ، بیماری سے شفا ، قید سے رہائی ، حکام کے نزدیک عزت و مرتبہ ، عہدے میں ترقی ، کمائی میں خیرو برکت ہوتی ہے۔ اس کے علاوہ تمام غم و فکر اور دشمنوں، ظالموں سے خلاصی ہوجاتی ہے۔ 

سال بھر میں صرف تین روز کی مختصر سی ریاضت بے شمار فوائد کا سبب بنتی ہے۔ 

دعائے مجیر یہ ہے ‘ اسے ہر نماز کے بعد جتنا ورد کرسکتے ہوںکریں۔ عشا کے بعد زیادہ کثرت سے پڑھیں۔

سُبحانکَ یا اللّٰہُ تعالِیتُ یا رحمٰنُ اَجِِرنَا مِنَّ النَارِ یا مُجِِِِِِیرُ۔ 

سُبحانکَ یا رحیمُ تعالِیتُ یا کریمُ اَجِِرنَا مِنَّ النَارِ یا مُجِِِِِِیرُُ ۔

وظیفہ برائے روزگار

موجودہ دور میں عام انسان کی زندگی ایک جہد مسلسل کا نمونہ ہے اور جدوجہد کے دوران میں کون سے مسائل ہیں جو انسان کو درپیش نہیں ہیں لیکن سب سے بڑا مسئلہ غم روزگار ہے ۔ اگر آپ بے روزگار ہیں تو رمضان کے مہینے میں نوچندی جمعرات ، جمعہ ، اتوار یا پیر کے دن سے یہ وظیفہ شروع کریں اور خدا کی قدرت کا نظارہ کریں۔

روزہ کھول کر مغرب کی نماز پڑھیں اور دعا مانگنے سے پہلے 11 بار درود شریف پڑھ کر 129 مرتبہ اسم الٰہی ”یالطیفُ“ کا ورد کریں۔ اس کے بعد سورہ شوریٰ کی آیت نمبر 19 نو مرتبہ پڑھیں۔ 

آیت یہ ہے‘ اعراب وغیرہ قرآن کریم سے دیکھ کر درست کر لیں۔

اَﷲُ لَطِیفُ ¾ بِعِبَادِہِِ یَر ±زُقُ مَنَّ یَشَائَ وَھَوَ القَویُ العزیز

پھر 11 بار درود شریف پڑھ کر رزق و روزگار کی ترقی اور کاروبار کے لیے یا بے روزگاری سے نجات کے لیے دعا کریں۔ یہ وظیفہ 40 دن تک کریں‘ انشاءاﷲ بہت خیر و برکت ہو گی اور روزگار سے متعلق مشکلات میں آسانی ہو گی۔

 خیال رہے کہ اس وظیفے کو اگر اس وقت تک جاری رکھا جائے جب تک خوش حالی نہ آجائے تو یہ بہت افضل ہوگا‘ کیونکہ رزق میں فراوانی کے لیے یہ بہت ہی مجرب عمل ہے جن لوگوں کے حالات ہمیشہ اپ اینڈ ڈاو ¿ن کا شکار رہتے ہیں۔ انہیں یہ وظیفہ لمبے عرصے تک جاری رکھنا چاہیے۔ اس کی برکت سے ان کی زندگی میں خوش حالی اور ترقی کے دروازے ہمیشہ کے لیے کھل سکتے ہیں مگر یقین کامل بھی ضروری ہے۔ 

وسعت و برکتِ رزق

اگر رزق میں برکت اور اضافہ نہیں ہے جو کچھ کماتے ہیں ، سب ختم ہوجاتا ہے بلکہ مہینے کے آخر میں اُدھار مانگنے کی نوبت آجاتی ہے، ہاتھ میں پیسہ نہیں رُکتا تو اس کے لیے ایک مجرب وظیفہ دیا جارہا ہے اس پر عمل کریں ، انشاءاللہ خیروبرکت بھی ہوگی اور رزق میں اضافہ بھی ہوگا۔

سب سے پہلے اپنے نام کے اعداد معلوم کریں اور پھر نوچندے اتوار ، پیر ، جمعرات یا جمعہ سے روزانہ عشاءکی نماز کے بعد یہ وظیفہ اول آخر درود شریف کے ساتھ شروع کریں اور بہتر یہ ہوگا کہ اسے کبھی ترک نہ کریں یعنی ہمیشہ پڑھتے رہیں۔

یَا وَاسِعُ وُس ±عَتِی

اب ایک مثال کے ذریعے اس عمل کی مزید وضاحت کی جارہی ہے مثلاً کسی کا نام محمد عادل ہے اور ماں کا نام فاطمہ ہے تو نام اور والدہ کے نام کے اعداد ابجد قمری سے نکالیں جو یہ ہوں گے۔

م ح م د ع ا د ل ف ا ط م ہ

40+8+40+4+70+1+4+30+80+1+9+40+5=332

پس معلوم ہوا کہ محمد عادل بنت فاطمہ کے کل اعداد 332 ہوئے لہٰذا روزانہ اول آخر گیارہ بار درود شریف کے ساتھ 332 مرتبہ مندرجہ بالا اسمائے الٰہی کا ورد کرکے اللہ سے دعا کیا کریں‘ عام لوگوں کو نام کے اعداد نکالنے کے لیے حروف تہجی کے اعداد معلوم نہیں ہوتے، گزشتہ کالموں میں ابجد قمری کا چارٹ شائع ہوچکا ہے اور اب ہماری ویب سائٹ (www. maseeha.com) پر بھی دیکھاجاسکتا ہے۔

عمل حل المشکلات

چاند رات کو عشاءکے بعد یا نیا چاند ہونے کے بعد کسی بھی نوچندے اتوار، پیر، جمعرات یا جمعہ سے دو رکعت نماز نفل برائے حاجت پڑھیں اور نفل کی ادائیگی کے بعد اپنی کسی بھی جائز حاجت کے لیے دعا کریں مثلاً شادی‘ مقدمہ میں کامیابی‘ قرض کی ادائیگی‘ رہائش سے متعلق پریشانی‘ کاروباری بندش ‘جاب کا حصول‘ دشمنوں کے شر سے نجات‘امیگریشن کے مسائل، الغرض کوئی بھی جائز مقصد ہو اسے ذہن میں رکھ کر دعا کی جائے اور اس عمل میں کوئی ناغہ نہ ہونے پائے‘ صرف خواتین کو خاص دنوں میں ناغہ کا حق حاصل ہے۔

گیارہ بار درود شریف اول و آخر کے ساتھ مندرجہ ذیل وظیفہ 473 مرتبہ پڑھیں اور پھر عاجزی اور انکساری کے ساتھ اللّٰہ سے اپنی مشکل کے حل کے لیے دعا کریں‘ وظیفہ یہ ہے۔

کٓھٰیٰعٓصٓ کِفَایَتنَا - حٓمٓعٓسٓقٓ حِمَایَتنَا

اس وظیفے کو رمضان کی ستائیسویں شب تک جاری رکھیں اور پھر ستائیسویں شب جس قدر بھی گڑگڑا کر، آہ و زاری کے ساتھ دعا کر سکتے ہیں، کریں اور دوسرے دن حسب توفیق غریبوں میں صدقہ و خیرات کریں۔ انشاءاللّٰہ مشکل سے مشکل اور خواہ کتنا ہی تکلیف دہ مسئلہ ہو، ضرور حل ہو جائے گا۔ 

عمل سورة القدر

سورہ ¿ قدر کا اس ماہ مبارک سے خصوصی تعلق ہے اور خصوصاً اس ماہ کے آخری عشرے کی طاق راتوں سے۔ اگر رمضان المبارک میں روزانہ 113 مرتبہ اس کی تلاوت کی جائے تو قلب و روح میں پاکیزگی پیدا ہوتی ہے اور خیالات فاسدہ سے نجات ملتی ہے، منفی سوچوں سے نجات اور نفسیاتی امراض سے چھٹکارا ملتا ہے۔

وہم، بدگمانی، مالیخولیا (Mood Disorder) ، خفقان، مراق، ہسٹیریا، شیزوفزینیا اور اس کے علاوہ سحر و جادو، جنات و آسیب وغیرہ کے مریضوں کو بھی اس سے فائدہ ہوتا ہے۔ اس سورة مبارکہ سے ایسے مریضوںکے علاج کا طریقہ یہ ہے۔

کوئی بھی خوشبودار پھول سفید رنگ کا لیں مثلاً چنبیلی، موتیا وغیرہ۔ پھول کا خوشبودار ہونا شرط ہے۔ سورة قدر کو 13 مرتبہ پڑھ کر پھول پر دم کریں اور مریض کو سنگھا دیں اور جب تک پھول میں خوشبو رہے وقتاً فوقتاً سنگھاتے رہیں۔ دوسرے دن پھر دوسرا تازہ پھول لے لیں اور اس پر حسب سابق دم کر کے سنگھاتے رہیں۔ 40 دن تک یہ عمل کریں انشاءاﷲ مرض جاتا رہے گا۔

دوسرا طریقہ

دوسرا طریقہ یہ ہے کہ عمدہ قسم کا چنبیلی یا زیتون کا تیل لے لیں اور رمضان کے آخری عشرے کی طاق راتوں میں عشاءکی نماز کے بعد 40 بار سورہ القدر پڑھ کر تیل پر دم کرتے رہیں۔ آخری طاق رات کے بعد یہ تیل استعمال کے لیے تیار ہو گا۔ اس تیل کی مالش مریض کے سر میں کریں۔ روزانہ کسی ایک ٹائم تھوڑا سا تیل سر میں ڈال کر اچھی طرح مالش کر دیا کریں۔ اگر مرض نہایت سخت ہے اور بیس پچیس دن یا اس سے زیادہ عرصے میں بھی مکمل شفایابی نہیں ہو رہی لیکن افاقہ نظر آ رہا ہے اور بوتل میں تیل ختم ہونے لگے تو بچے ہوئے تھوڑے سے تیل میں چنبیلی یا زیتون کا مزید تیل ڈال کر بوتل پھر بھر لیں اور اس طرح پڑھے ہوئے تیل کو ختم نہ ہونے دیں۔ انشاءاﷲ مکمل شفا ہو گی۔

قید و بند سے رھائی

اس مجرب وظیفے کو بیان کرنے کی ضرورت اس لیے محسوس ہو رہی ہے کہ اکثر لوگ بذریعہ فون کسی ناگہانی کیس میں پھسنے اور حوالات یا جیل میں بند ہونے کے بارے میں بتاتے رہتے ہیں۔ یہ درست ہے کہ ایسے تمام معاملات میں سب سے پہلے مادی طور طریقوں سے ہی مدد لینی چاہیے اور قانونی معاملات کو قانونی طریقوں سے ہی حل کرنا چاہیے لیکن جو لوگ بے قصور ہیں یا دانستہ یا نادانستہ کسی غلطی کے مرتکب ہو کر قید و بند کی مصیبت کا شکار ہوئے ہوں ، ان کے لیے بہترین وظیفہ ہمارے تجربے کے مطابق یہی ہے کہ وہ بلا تعداد چلتے پھرتے اٹھتے بیٹھتے وضو بے وضو آیتہ الکریمہ کا ورد اگلی آیت تک کریں یعنی "لا الہ الا انت سبحانک" سے اگلی آیت کے اختتام "وکذالک ننجل مومنین" (سورہ الانبیائ) تک پڑھیں، انشاءاللّٰہ جلد قید سے رہائی کے لیے کوئی ذریعہ پیدا ہو جائے گا ۔ اگر اس دوران میں ہفتے کے دن پرندوں کو آزاد کرنے کا صدقہ بھی دیتے رہیں تو بہترین بات ہو گی ۔ 

برائے ترک عاداتِ بد

بچوں کی یا کسی بھی چھوٹے بڑے کی کوئی بری عادت چھڑانے کے لیے ایک نہایت آسان عمل ہم لکھ رہے ہیں ، رمضان المبارک کے پہلے جمعہ کو بعد نماز جمعہ 100 مرتبہ اسمِ الٰہی ”اَلتَوَّاب“اول آخر سات مرتبہ درود شریف کے ساتھ پڑھ کر پانی پر دم کریں اور یہ پانی پلادیں، یہ عمل روزانہ 21 دن تک کریں، انشاءاللہ کوئی بھی بری عادت ہو وہ ختم ہوجائے گی۔

دعائے امان

ایسے لوگ جو کسی بھی نوعیت کی سختی کا شکار ہوں۔ گردش سیارگان یعنی وقت کی خرابی چل رہی ہو۔ سیارہ زحل کی نحوست کا شکار ہوں یا سالانہ زائچہ نحس اثرات سال بھر کے لیے ظاہر کرتا ہو اور خصوصاً ان کے کاموں میں رکاوٹیں اور مشکلات پیدا ہو رہی ہوں یا نقصانات اور حادثات سے واسطہ پڑ رہا ہو، انہیں "دعائے امان" کو مستقل اپنے ورد میں رکھنا چاہیے اور اس کا طریقہ یہ ہے کہ ہر روز صبح گھر سے نکلنے سے پہلے 7 بار، 9 بار یا 11 بار اس چھوٹی سی دعا کو پڑھ لیا کریں اور اپنے سینے پر دم کر لیا کریں پھر دونوں ہاتھوں پر دم کر کے چہرے پر پھیر لیا کریں‘ دعائے امان یہ ہے۔

بِسمِ اللّٰہِ الاعظمِِِ الذی لا یَضُّرُ مَع اِسمہِ شیً فی الارضِ ولا فی السَمائِ وَ ھُو السَّمیعُ العلیم

اگر مشکلات اور نحوست کچھ زیادہ ہی چل رہی ہو تو اس سے نجات کے لیے اس دعا کو اپنے نام اور والدہ کے نام کے اعداد کے مطابق روزانہ پڑھیں اور اگر وظیفے کے طور پر اس کا آغاز کرنا ہو تو پھر نو چندے ہفتے سے شروع کریں اور 9 دن، 18 دن، 27 دن یا 90 دن تک پڑھیں۔ نو چندہ ہفتہ وہ ہو گا جو چاند کی 3 تاریخ کے بعد پہلا ہفتہ ہو گا۔ اگر اس مبارک مہینے میں کوئی شروع کرنا چاہے تو کسی بھی ہفتے سے شروع کر سکتا ہے۔

اپنے نام اور والدہ کے نام کے اعداد نکالنے کا طریقہ مع ابجدِ قمری پہلے دیا گیا ہے۔

سخت دل شوہر یا بیوی

اکثر خواتین یا بعض مرد یہ شکایت کرتے ہیں کہ اُن کا شوہر یا بیوی نہایت سخت دل اور بے پروا ہے،خاص طور پر یہ شکایت خواتین کو ہوتی ہے کہ شوہر محبت نہیں کرتا، خیال نہیں رکھتا، مالی طور پر پریشان کرتا ہے یا مارپیٹ کرتا ہے، بچوں کی ضروریات بھی پوری نہیں کرتا وغیرہ وغیرہ، بعض کیسوں میں خواتین عادتاً بھی اس شکایت کا اظہار کرتی رہتی ہے،حالاں کہ حقیقتاً ان کی یہ شکایت جائز نہیں ہوتی۔

اس مسئلے کے حل کے لیے ایک نہایت آسان وظیفہ دیا جارہا ہے،رمضان کے پہلے جمعہ کو صبح طلوعِ آفتاب کے وقت پانی کی ایک بوتل پر پوری سورئہ یٰس پڑھ کر دم کردیں،یہ کام روزانہ 21 دن تک کریں،یعنی پہلے جمعہ سے شروع کریں اور 21 دن پورے کریں،اگر درمیان میں ناغہ کے دن آجائیں تو وظیفہ چھوڑ دیں اور بعد میں 21 دن پورے کریں،اس کے بعد یہ پانی روزانہ تھوڑا تھوڑا خاوند کو پلانا شروع کردیں،پانی تھوڑا سا رہ جائے تو مزید پانی ڈال کر بوتل دوبارہ بھر لیں،انشاءاللہ اس کا دل نرم ہوجائے گا اور گھر اور بچوں سے محبت پیدا ہوجائے گی،آپ کا خیال رکھے گا۔