ستمبر کی فلکیاتی صورت حال ایک ستم گر مہینے کا آغاز

کراچی کی سیاست کے نئے رنگ اور جناب الطاف حسین کے زائچے پر ایک نظر

پاکستان کی سالگرہ کا مہینہ اگست حسب روایت نئی ہنگامہ خیزیوں کے ساتھ شروع ہوا، میدان سیاست میں خاصی گرم بازاری دیکھنے میں آئی، البتہ عوام نے جشن آزادی نہایت جوش و خروش کے ساتھ بنایا، اہل سیاست اپنے اپنے نئے پینترے بدل رہے ہیں، پورے ملک کو اور خاص طور پر کراچی کو ایک زبردست جھٹکا جناب الطاف حسین کی ایک متنازع تقریر سے لگا اور نتیجے کے طور پر نائن زیرو کے علاوہ متحدہ قومی موومنٹ کے بہت سے دفاتر بند کردیے گئے،جناب فاروق ستار نے دوسرے روز اپنی پریس کانفرنس میں متنازع تقریب سے لاتعلقی کا اعلان کیا اور فرمایا کہ اب ایم کیو ایم کو مقامی رابطہ کمیٹی آزادانہ طور پر آپریٹ کرے گی لیکن فوراً ہی جوابی کارروائی لندن سیکریٹریٹ سے کی گئی اور بتایا گیا کہ مقامی رابطہ کمیٹی حسب سابق آئندہ بھی اپنے فیصلوں میں آزاد نہیں ہوگی، وغیرہ وغیرہ۔

کراچی اور پورے پاکستان کے لیے اگست کے مہینے میں یہ صورت حال خاصی دھماکہ خیز رہی، ہم بہت پہلے ایم کیو ایم کے اندرونی خلفشار اور تقریباً 2017 ءتک جاری رہنے والی انقلابی تبدیلیوں کی نشان دہی کرچکے ہیں،ایم کیو ایم ایک انقلابی عمل سے گزر رہی ہے اور اُس کی وجہ یہ ہے کہ ایم کیو ایم کے زائچے میں تیسرے گھر کا حاکم سیارہ زحل بارھویں گھر میں حرکت کر رہا ہے، 2017 ءمیں زحل برج تبدیل کرے گا، اُس وقت تک موجودہ اکھاڑ پچھاڑ جاری رہے گی،اب خود ایم کیو ایم کے سنجیدہ افراد یہ اعتراف کرنے لگے ہیں کہ پارٹی سے ناپسندیدہ عناصر کا انخلا ضروری ہوگیا ہے،وقت کے تقاضے تبدیل ہورہے ہیں،موجودہ دور میں جب کہ الیکٹرونکس میڈیا کے ساتھ سوشل میڈیا زیادہ فعال اور طاقت ور ہوچکا ہے،سیاست کے پرانے رنگ ڈھنگ بدلنے کی ضرورت ہے،صرف ایم کیو ایم ہی نہیں ، ملک کی دیگر سیاسی جماعتوں کو بھی پرانے فرسودہ طور طریقوں سے پاک کرنے کی ضرورت ہے،الیکٹرونکس یا پرنٹ میڈیا بے شک چند ہاتھوں میں ہونے کی وجہ سے کسی حد تک کنٹرول ہوسکتا ہے لیکن سوشل میڈیا مادر پدر آزاد ہے، اسے لگام دینے کے لیے ہمارے اہل سیاست سائبر کرام بل لے آئے ہیں لیکن وہ یہ بھول گئے ہیں کہ عوام ایسے قوانین کو خاطر میں نہیں لاتے۔

اپنی پریس کانفرنس میں جناب فاروق ستار نے بتایا کہ جناب الطاف حسین کے ساتھ صحت کے مسائل نہایت سنجیدہ نوعیت کے ہیں جن کی وجہ سے انہیں اپنے اعصاب اور جذبات پر قابو نہیں رہتا، انہوں نے مشورہ دیا کہ سب سے پہلے ان مسائل کو حل کرنے کی ضرورت ہے۔

الطاف بھائی کا شمسی اور پیدائشی برج سنبلہ ہے جب کہ قمری برج قوس ہے، وہ چاند کی منزل مُولا میں پیدا ہوئے ہیں، بہت پہلے جب ہم نے ان کا زائچہ بنایا تھا تو اسے شائع کرنے کا ارادہ تھا لیکن بعض ناگزیر وجوہات کی بنا پر یہ ارادہ ملتوی کرنا پڑا لیکن برسبیل تذکرہ ہم ان کی صحت کے حوالے سے نشان دہی کرتے رہے ہیں، تقریباً نومبر 2015 ءسے ان کے زائچے میں راہو کے دور اکبر میں سیارہ مریخ کا دور اصغر جاری ہے،مریخ ، زحل اور شمس ان کے لیے نہایت سخت اثر دینے والے منحوس سیارے ہیں، اس کے علاوہ راہو کیتو بھی منحوس اثر رکھتے ہیں، مریخ کا دور اصغر تقریباً نومبر 2016 ءتک جاری رہے گا، اس کے دور میں صحت کے مسائل ، ذہنی ٹینشن، لاشعوری خوف وغیرہ کی نشان دہی ہوتی ہے،مریخ زائچے کا سب سے منحوس سیارہ اور بارھویں گھر میں ہے،ٹرانزٹ پوزیشن میں مریخ اور زحل تیسرے گھر میں ہےں جو ذہن ، کوشش اور اقدام سے متعلق ہے، 24 اگست کو دونوں قران کر رہے ہیں،راہو کیتو کی اسٹینشری پوزیشن شروع اگست سے اکتوبر تک زائچے کے حساس مقامات کو متاثر کر رہی ہے،یہ تمام عوامل شدیدنوعیت کے مسائل اور ذہنی دباو ¿ کی نشان دہی کر رہے ہیں، اگر وہ پابندی کے ساتھ ہفتہ، اتوار اور منگل کو صدقات دیں تو بہت بہتر ہوگا۔

ہم نے سنا ہے کہ وہ قیمتی پتھروں کے شوقین ہیں، شاید فیروزہ بھی پہنتے ہیں، بے شک یہ ان کے لیے مفید پتھر ہے لیکن موجودہ صورت حال میں عمدہ قسم کا زمرد اور سچا موتی استعمال کرنا چاہیے، یہ انہیں اعصابی اور دماغی طور پر تقویت پہنچائے گا، بہتر یہ ہوگا کہ اسے کسی مناسب موقع پر پہنا جائے۔

کراچی اور سندھ کی بدلتی صورت حال کے بعد آئیے آنے والے ستم گر مہینے ستمبر کی مجموعی فلکیاتی صورت حال پر حسب روایت ایک نظر ڈال لی جائے۔

ستمبر کے ستارے

اقتدار کا ستارہ شمس برج سنبلہ میں حرکت کر رہا ہے،22 ستمبر کو اپنے ہبوط کے برج میزان میں داخل ہوگا، خبر اور سفر کا سیارہ عطارد اپنے ذاتی برج سنبلہ میں بحالتِ رجعت حرکت کر رہا ہے،22 ستمبر کو سیدھی چال پر آئے گا، توازن اور ہم آہنگی کا سیارہ زہرہ اپنے ذاتی برج میزان میں ہے،23 ستمبر کو برج عقرب میں داخل ہوگا، قوت و توانائی کا سیارہ مریخ برج قوس میں ہے اور 27 ستمبر کو اپنے شرف کے برج جدی میں داخل ہوگا، سیارہ مشتری گزشتہ سال سے برج سنبلہ میں حرکت کررہا ہے، اس سال 9 ستمبر کو برج میزان میں داخل ہوگا، یہاں اسے اوج کی قوت حاصل ہوتی ہے،آئندہ سال تک مشتری اسی برج میں حرکت کرے گا، محنت اور جدوجہد کا سیارہ زحل برج قوس میں حرکت کر رہا ہے،ایجادات اور غیر متوقع صورت حال کا سیارہ یورینس برج حمل میں جب کہ پراسرار نیپچون بحالت رجعت برج حوت میں ، کایا پلٹ کا ستارہ پلوٹو برج جدی میں بحالت رجعت حرکت کر رہا ہے،26 ستمبر کو اپنی سیدھی چال پر آئے گا، راس و ذنب بالترتیب سنبلہ اور حوت میں حرکت کر رہے ہیں،تقریباً اگست سے دونوں اسٹیشنری پوزیشن میں ہیں یعنی ایک ہی درجے پر موجود ہیں،یہ صورت حال اکتوبر تک جاری رہے گی، ایسی پوزیشن غیر معمولی اثرات کی حامل ہوتی ہے اور وہ لوگ یا ممالک اس صورت حال سے متاثر ہوتے ہیں جو اس کی زد میں آتے ہیں یعنی اُن کے طالع کے درجات یا کسی سیارے کے درجات وہی ہوں جو راس و ذنب کے اسٹیشنری پوزیشن میں ہیں۔

نظرات و اثراتِ سیارگان

ستمبر میں اہم سیارگان کے درمیان تربیع کے پانچ زاویے قائم ہوں گے، 2 مقابلے، 3 قرانات، تسدیس کے 2 اور تثلیث کے 3 زاویے ہوں گے،یہ صورت حال مجموعی طور پر مثبت نہیں ہے،تربیع اور مقابلے کے زاویے منحوس اثر رکھتے ہیں اور اس مہینے میں ان کی کثرت ہے،اسی طرح قرانات کا اثر مختلف زائچوں میں مختلف ہوسکتا ہے یعنی کہیں سعد تو کہیں نحس، البتہ تثلیث اور تسدیس کے زاویے ہمیشہ سعد اثر رکھتے ہیں جو اس ماہ بہت کم ہیں لہٰذا مجموعی طور پر ستمبر کو ایک منفی اثر رکھنے والا مہینہ کہنا پڑے گا، ترتیب وار تمام زاویوں کی تفصیل درج ذیل ہے۔

ایک ستمبر: شمس اور زحل کے درمیان تربیع کا زاویہ نحس اثر رکھتا ہے، خاص طور پر صاحبان اقتدار کے لیے یہ مشکل وقت ہوتا ہے، اس زاویے کے زیر اثر گورنمنٹ سے متعلق کاموں میں رکاوٹ یا التوا وغیرہ کا سامنا ہوتا ہے،پراپرٹی سے متعلق کام بھی متاثر ہوتے ہیں۔

اسی تاریخ کو شمس اور نیپچون کے درمیان مقابلے کی نظر بھی نحس اثرات کی حامل ہے،یہ بھی صاحب اقتدار اور باحیثیت افراد کے لیے کسی پریشانی یا بڑے نقصان کا اشارہ ہوتا ہے،گورنمنٹ سے متعلق معاملات میں الجھاو ¿ اور پیچیدگیاں جنم لیتی ہیں۔

دو ستمبر ہی کو ایک سعد نظر عطارد اور مشتری کے درمیان قران کی ہوگی جو سفر اور حصول معلومات یا تعلیمی سرگرمیوں کے لیے موافق و مددگار ثابت ہوگی لیکن خیال رکھنے کی ضرورت ہوگی کہ عطارد حالت رجعت میں ہے لہٰذا کنفیوژن اور گھماو ¿ پھراو ¿ کا شکار نہ ہوں، دوسروں کے مشوروں پر بھی آنکھیں بند کرکے عمل نہ کریں۔

سات ستمبر: شمس اور پلوٹو کے درمیان تثلیث کی سعد نظر بین الاقوامی یا ملکی معاملات میں اہمیت رکھتی ہے،عام آدمی کی زندگی پر اس کا کوئی فوری اثر دیکھنے میں نہیں آتا، ملکی اور بین الاقوامی معاملات میں یہ نظر کسی پاور پلے کا رجحان لاتی ہے۔

اسی تاریخ کو عطارد اور زحل کے درمیان تسدیس کا سعد زاویہ ہوگا، یہ سعد نظر ہے ، سفر سے فائدہ ، ٹرانسپورٹ یا پراپرٹی سے متعلق معاملات کو بہتر طور پر طے کرنے یا آگے بڑھانے میں مددگار ہوگی، اس وقت نئے معاہدات اور دیگر تحریری امور انجام دیے جاسکتے ہیں۔

دس ستمبر: زحل اور نیپچون میں تربیع کی نظر نہایت منحوس اثر رکھتی ہے،خاص طور پر عام محنت کش افراد اس سے متاثر ہوتے ہیں، وہ بالادست لوگوں کے ظلم و زیادتی کا نشانہ بنتے ہیں،یہ وقت حادثات ارضی و سماوی کی نشان دہی بھی کرتا ہے۔

گیارہ ستمبر: زہرہ اور پلوٹو کے درمیان تربیع کا زاویہ نحس اثر رکھتا ہے، منفی رجحانات اور شدت پسندانہ سرگرمیاں نمایاں ہوتی ہیں، خصوصاً خواتین سے متعلق جرائم میں اضافہ ہوتا ہے، معاشرے میں بے راہ روی کے رجحانات جنم لیتے ہیں۔

بارہ ستمبر: عطارد اور مریخ کے درمیان اسکوائر کا زاویہ نحس اثر رکھتا ہے،یہ وقت ٹرانسپورٹ سے متعلق حادثات اور بچوں سے متعلق ناخوش گوار واقعات لاتا ہے،ٹیکنیکل نوعیت کے کاموں میں الجھن اور پریشانی بڑھتی ہے، اس دوران میں مشینری سے متعلق خریدوفروخت نامناسب رہے گی۔

تیرہ ستمبر: عطارد اور شمس کا قران بعض لوگوں کے لیے نحس اثر رکھتا ہے جب کہ بعض کے لیے سعد، مجموعی طور پر یہ کاموں میں خرابی اور رکاوٹ لاتا ہے،بے وقوفی اور غیر دانش مندانہ فیصلے سامنے آتے ہیں، یہ وقت تحریری کاموں، دستاویزات کی تیاری، سفر یا کسی مذاکراتی عمل کے لیے ناموافق ہوتا ہے۔

چودہ ستمبر: شمس اور مریخ کے درمیان تربیع کی نظر نہایت سخت اور نحس اثر رکھتی ہے،حکومت کی جانب سے طاقت کا استعمال یا کالے قوانین کا نفاذ دیکھنے میں آتا ہے،ملکوں کے درمیان کشیدگی پیدا ہوتی ہے،فوج ، پولیس اور دیگر بااختیار ادارے عوامی حقوق اور خواہشات کے خلاف کام کرتے ہیں، عام افراد میں یہ نظر آمرانہ اور جارحیت پسندانہ رویے کو جنم دیتی ہے، لوگوں میں انا کے مسائل پیدا ہوتے ہیں۔

سترہ ستمبر: مریخ اور یورینس کے درمیان تثلیث کا سعد زاویہ نئی ایجادات اور نئے آئیڈیاز کا باعث بنتا ہے،چونکا دینے والی خبریں سامنے آتی ہیں،ٹیکنیکل معاملات اور الیکٹرونکس سے متعلق معاملات غیر معمولی ترقی کرتے ہیں،سائنس کے میدانوں میں نئی کامیابیاں حاصل ہوتی ہیں، عام آدمی کی زندگی میں بھی نئے مواقع اور نئی پیش رفت کا امکان ہوتا ہے،یہ الگ بات ہے کہ بعض لوگ ایسے وقت سے فائدہ اٹھاتے ہیں اور بعض اپنی فطری کمزوریوں کی وجہ سے ان مواقعوں کو ضائع بھی کردیتے ہیں۔

اٹھارہ ستمبر: زہرہ اور یورینس کے درمیان مقابلے کی نظر نحس اثر رکھتی ہے،خصوصاً خواتین کے لیے، انہیں محتاط رہنا چاہیے، کسی تبدیلی یا متنازع بحث مباحثے سے گریز کرنا چاہیے،ایسی صورت حال سے بچنا چاہیے جو نہایت جذباتی قسم کی ہو، رومانی معاملات یا ازدواجی زندگی سے متعلق امور میں اچانک کوئی نیا منفی موڑ سامنے آسکتا ہے جو سب کچھ تباہ کرسکتا ہے، مرد حضرات اس وقت میں خواتین کے حوالے سے کوئی غلط فیصلہ کرسکتے ہیں۔

انیس ستمبر: زہرہ اور مریخ کے درمیان تسدیس کا سعد زاویہ مبارک ہے جو فوری طور پر زہرہ اور یورینس کے نحس زاویے کی کاٹ کرنے میں مددگار ہوگا، زہرہ کو عورت اور مریخ کو مرد قرار دیا گیا ہے، چناں چہ یہ سعد زاویہ دونوں کے درمیان باہمی کشش اور رغبت پیدا کرتا ہے،اس وقت میں رومانی دلچسپیاں یا شادی وغیرہ سے متعلق معاملات طے کرنے میں آسانی ہوتی ہے،عموماً عورت و مرد کے درمیان جذب و کشش کے عملیات اس وقت میں کیے جاتے ہیں۔

اکیس ستمبر: عطارد و پلوٹو کے درمیان تثلیث کی نظر سعد اثر رکھتی ہے،یہ وقت بھرپور ذہنی قوتوں سے کام لینے کے لیے بہتر ہے،کسی سفر کی منصوبہ بندی یا حسب ضرورت معلومات کا حصول بہتر ہوتا ہے، 21 ستمبر کے بعد 23 ستمبر کو بھی یہ زاویہ بنے گا، اگر اپنے حالات یا معاملات میں کوئی تبدیلی لانے کا ارادہ ہو تو اس وقت کا انتخاب بہتر رہے گا، کوئی نئی منصوبہ بندی کی جاسکتی ہے۔

چھبیس ستمبر: شمس اور مشتری کا قران سعد اثر رکھتا ہے،گورنمنٹ سے متعلق معاملات بہتر ہوتے ہیں،عام افراد کے لیے مالی امور پر توجہ دینا ، آئندہ کا بجٹ یا حسابات چیک کرنا بہتر رہتا ہے لیکن کوئی نئی انویسٹمنٹ کرنا مناسب نہیں ہوگا، سرکاری حکام اور افسران بالا سے بات چیت یا معاملات طے کرنے میں مدد مل سکتی ہے۔

قمر در عقرب

ستمبر میں قمر برج عقرب میں پیر کی پانچ تاریخ کو پاکستان ٹائم کے مطابق5:38 pm پر داخل ہوگا اور جمعرات آٹھ ستمبر صبح 06:20 am تک رہے گا، اس دوران میں اپنے درجہ ءہبوط پر پانچ ستمبر کو رات 09:43 pm سے 11:43 pm تک رہے گا، جب کہ ٹورنٹو اور نیویارک ٹائم کے مطابق درجہ ءہبوط پر 11:43 am سے 01:43 pm تک ہوگا، جیسا کہ آپ جانتے ہیں کہ یہ انتہائی منحوس وقت شمار کیا جاتا ہے، اس وقت کوئی نیا کام شروع نہیں کرنا چاہیے،البتہ علاج معالجے ، بیماریوں سے نجات، دشمنوں اور مخالفین سے نجات کے لیے کوشش کرنا بہتر ہوتا ہے،اس وقت روک تھام اور بندش کے عملیات کیے جاتے ہیں، چاند اور سورج گہن میں جو اعمال و وظائف کیے جاتے ہیں وہ اس وقت بھی کرسکتے ہیں۔

شرف قمر

شرف قمر کا سعد وقت اس ماہ انیس ستمبر کو ہوگا، پاکستان ٹائم کے مطابق دوپہر 01:14 pm سے 02:50 pm تک قمر درجہءشرف پر رہے گا جب کہ ٹورنٹو اور نیویارک ٹائم کے مطابق انیس ستمبر کو 03:14 am سے 04:50am تک قمر کو شرف ہوگا، یہ مبارک اور سعد وقت ہے اس وقت نیک اعمال خصوصاً شفائے امراض، روزگار، ترقی اور جائز خواہشات کے حصول کے لیے عمل و وظائف کرنا چاہیے، اس وقت اسمائے الٰہی یارحمنُ یا رحیم 256 مرتبہ اول آخر درود شریف کے ساتھ پڑھ کر اپنے مقصد کے لیے دعا کریں، انشاءاللہ کامیابی ہوگی، اس وقت بسم اللہ الرحمن الرحیم 786 بار پڑھ کر چینی پر دم کرنے والا عمل بھی ہم کئی بار لکھ چکے ہیں، مزید میاں بیوی کے درمیان یا دو افراد کے درمیان اتحاد و اتفاق پیدا کرنے کے لیے بھی یہ عمل کیا جاسکتا ہے اور اس کا طریقہ یہی ہوگا کہ بسم اللہ 786 بار پڑھ کر کسی میٹھی چیز مٹھائی وغیرہ پر دم کریں اور دونوں فریقین کو آدھی آدھی کھلادیں، بعد میں کامیابی نہ ہو تو تو دوسرے شرف قمر میں دوبارہ یہی عمل دہرائیں اور کم از کم 3 ماہ تک اس عمل کو دہراتے رہیں تو انشاءاللہ دونوں کے درمیان اتفاق و یگانگت پیدا ہوگی، عام طور پر میاں بیوی کے علاوہ لوگ شکایت کرتے ہیں کہ ان کے بچوں کے درمیان نا اتفاقی یا لڑائی جھگڑا ہوتا رہتا ہے،یہ عمل ایسی صورت حال میں بہترین نتائج دے گا، انشاءاللہ۔

اوج مشتری

سیارہ مشتری کو برج سرطان میں شرف کی قوت حاصل ہوتی ہے اور یہ وقت 2013 ءمیں آیا تھا، بے شمار افراد نے اس وقت لوح مشتری یا خاتم مشتری وغیرہ تیار کی ہوگی کیوں کہ مشتری کو ترقی ، وسعت اور خوش حالی کا سیارہ کہا جاتا ہے،لوح مشتری دولت کے حصول کے لیے تیار کی جاتی ہے، اس سال سیارہ مشتری نو ستمبر کو اپنے برج اوج میزان میں داخل ہورہا ہے،میزان کے تین درجے پر اسے اوج کی قوت حاصل ہوتی ہے،ستمبر میں سیارہ مشتری 14 ستمبر صبح 08:19:31 am سے درجہ ءاوج پر ہوگا اور انیسستمبر رات 12:08:52 am تک اسی درجے پر رہے گا۔

ٹورنٹو اور نیویارک ٹائم کے مطابق اوج مشتری کا آغاز تیرہ ستمبر 10:19:31 pm سے ہوگا اور اختتام انیس ستمبر 02:08:52 pm پر ہوگا۔تقریباً 6 روز تک مشتری درجہ ءاوج پر رہے گا، اس دوران میں مشتری کی ساعات میں لوح مشتری یا خاتم مشتری وغیرہ تیار کی جاسکتی ہیں،ا س سلسلے میں حسب سابق ”لوح مشتری نورانی“ اور خاتم مشتری کی تیاری کا طریقہ انشاءاللہ آئندہ ہفتے دیا جائے گا، مزید معلومات کے لیے براہ راست رابطہ کرسکتے ہیں۔

سال کے آخری چاند اور سورج گہن اور متعلقہ اعمال و وظائف

حروف صوامت ، اسمائے الٰہی القابض اور سورئہ اخلاص کی زکات کا آسان طریقہ 

سورج یا چاند گرہن کا وقت مخصوص اثرات کا حامل ہوتا ہے، عموماً اس وقت میں حساسیت اور روحانیت اپنا گہرا اثر چھوڑتی ہے لہٰذا روحانی اعمال اس وقت زیادہ مو ¿ثر ثابت ہوتے ہیں، ہم برسوں سے ان اوقات سے متعلق عملیات و نقوش شائع کر رہے ہیں جن سے بے شمار افراد نے فائدہ اٹھایا ہے اور انشاءاللہ آئندہ بھی اٹھائیں گے۔

گرہن کے وقت حروف صوامت کی زکات ادا کی جاتی ہے، اس کا طریقہ بھی ہم تفصیل سے بہت پہلے لکھ چکے ہیں اور ہماری کتاب مسیحا حصہ دوم میں بھی موجود ہے، اعمال کے شوقین حضرات حروف صوامت سے متعلق دیگر کتب و رسائل سے بھی استفادہ کرتے ہیں۔

 حروف صوامت”گپ چپ“ کے حروف کہلاتے ہیں، اٹھائیس حروف تہجی میں یہ وہ حروف ہیں جن پر کوئی نقطہ نہیں ہوتا، ان کی تعداد تیرہ ہے اور ان تیرہ حروف کے اعداد ابجد قمری سے 543 ہیں اور حروف یہ ہیں۔

ا۔ح۔د۔ر۔س۔ص۔ط۔ع۔ک۔ل۔م۔و۔ہ۔اگر انہیں باہم ملاکر لکھا جائے تو مختلف کلمے یا لفظ بن سکتے ہیں، ایسے کلموں یا الفاظ کو طلسمی لفظ کہا جاتا ہے،مثلاً احد، رسص، طعک، لموہ وغیرہ۔

گرہن کے وقت خالی پینسل سے 543 مرتبہ شرائط و قواعد کے مطابق اگر ان حروف کو لکھ لیا جائے اور پھر لکھے ہوئے کاغذات کو قبرستان میں دفن کردیا جائے تو ان حروف کی زکاتِ اصغر ادا ہوجاتی ہے،اگر تین سال تک یہ زکاتِ اصغر پابندی سے ادا کی جائے تو خود بہ خود زکاتِ اکبر ہوجاتی ہے اور اس کے بعد روزانہ مداومت کی ضرورت نہیں رہتی، زکاتِ اصغر کی صورت میں ان حروف کو تیرہ مرتبہ روزانہ لکھتے رہنا لازمی ہے، اس طرح زکات کا اثر قائم رہتا ہے، یہ زکات ایک سال کے لیے ہوتی ہے۔

 زکات ادا کرنے کے بعد صاحب زکات حروف صوامت سے کام لے سکتا ہے اور ان حروف سے متعلقہ اعمال نقش و طلسم تیار کرکے دوسروں کو دے سکتا ہے، حقیقت یہ ہے کہ جو لوگ ان حروف کی زکات ادا کرنے کے بعد ان سے کام لینے کا درست طریقہ جان لیتے ہیں وہ حیرت انگیز کارنامے انجام دیتے ہیں، انسانی ضروریات کے ایک چوتھائی حصے سے متعلق کام حروف صوامت کی مدد سے انجام دیے جاسکتے ہیں، ایک بہت بڑی روحانی قوت ان حروف کے عامل کو حاصل ہوجاتی ہے۔

 عام لوگوں کی فوری ضرورت کے لیے سیدھے سادے عام فہم اور آسان اعمال ہی کافی ہیں لہٰذا ہم نے ایسے طریقوں کو فروغ دیا، لوگوں نے بھی اسے پسند کیا اور اس سے فائدہ اٹھایا، ہماری روایت بدستور قائم ہے۔

بہت سے لوگ حروف صوامت کی زکات کے لیے ہر گہن سے پہلے رابطہ کرتے ہیں اور زکات ادا کرنے کے لیے اجازت طلب کرتے ہیں، اس سلسلے میں صرف ایک فون کرنا کافی سمجھتے ہیں، ہمارے نزیک یہ طریقہ غلط ہے،ایسے کسی بھی شخص کو اتنے اہم اور نہایت سنجیدہ نوعیت کے معاملے میں فون پر کیسے اجازت دی جاسکتی ہے جس کے بارے میں ہم کچھ بھی نہ جانتے ہوں، اس کی تعلیم کتنی ہے؟ عمر کتنی ہے؟ عملیات و نقوش اور قواعد عملیات سے کس قدر واقفیت رکھتا ہے؟اس راستے پر قدم آگے بڑھانے کی اُسے کیا ضرورت درپیش ہے؟ دنیاوی طور پر اس کے حالات اور دیگر معاملات کیا ہیں؟ وغیرہ وغیرہ، جب تک یہ تمام معلومات نہ ہوں، کیسے کسی شخص کو اس راستے پر رہنمائی فراہم کی جائے، بہر حال یہ ایک برسبیل تذکرہ مسئلہ تھا جو ہمیں اکثر درپیش رہتا ہے،چناں چہ اس کا اظہار کردیا۔

سال کے آخری سورج اور چاند گہن

اس بار 2 ایسے سورج اور چاند گہن لگ رہے ہیں جو حروف صوامت کی زکات کے لیے موزوں ہیں لیکن ہم اس پر زور نہیں دیں گے کہ عام لوگ خود کو اس مشقت میں ڈالیں،اس کے بجائے ایک اور عمل کی زکات کا طریقہ دیا جارہا ہے جو عام آدمی کے لیے زیادہ مشکل بھی نہیں ہے اور اس کے فوائد بھی بے شمار ہیں، آئندہ تقریباً ڈیڑھ ماہ میں یکے بعد دیگرے 3 گہن لگیں گے۔

پہلا چاند گہن 18 اگست کو پاکستانی وقت کے مطابق برج دلو کے 25 درجہ 52 دقیقہ پر لگے گا، اس گہن کی ابتدا دوپہر 12:33 pm پر ہوگی اور مکمل گہن دوپہر 02:25 pm پر ہوگا، گہن کا خاتمہ 03:21 pm پر ہوگا ،پاکستان میں نظر نہیں آئے گا، البتہ امریکا اور بحر الکاہل کے اردگرد کے علاقوں میں دیکھا جاسکے گا، یہ چاند گہن پاکستان میں زکات ادا کرنے کے لیے موزوں نہیں ہیں، البتہ امریکا اور کینیڈا میں اس سے فائدہ اٹھایا جاسکتا ہے،نیو یارک اور ٹورنٹو ٹائم کے مطابق یہ گہن 02:33am پر شروع ہوگا، مکمل گہن 04:21 am پر ہوگا جب کہ اس کا خاتمہ 03:21 pm پر ہوگا۔

دوسرا ہالا دار سورج گہن یکم ستمبر کو برج سنبلہ کے 9 درجہ 21 دقیقے پر لگے گا، پاکستانی وقت کے مطابق اس کی ابتدا دوپہر 12 بجے ہوگی جب کہ مکمل گہن دوپہر 02:07 pm پر ہوگا،اس کا خاتمہ 03:05 pm پر ہوگا، ٹورنٹو اور نیو یارک ٹائم کے مطابق ابتدا 02:00 am پر ہوگی، مکمل 04:07 am پر ہوگا اور خاتمہ 05:05 am پر۔یہ گہن پاکستان میں نظر آئے گا اور زکات کی ادائیگی کے لیے موزوں ہوگا۔

 تیسرا چاند گہن 16 اور 17 ستمبر کی درمیانی رات میں ہوگا، یہ مکمل گہن ہوگا اور مو ¿ثر ہوگا، اس کی ابتدا پاکستان ٹائم کے مطابق 16 ستمبر رات 10:08 pm پر ہوگی جب کہ مکمل گہن 11:53 pm پر ہوگا، اس کا خاتمہ 17 ستمبر رات 12:00:04 am پر ہوگا، ٹورنٹو اور نیو یارک ٹائم کے مطابق اس گہن کی ابتدا دوپہر 12:08 pm پر ہوگی، مکمل گہن 01:53 pm پر ہوگا، اس کا خاتمہ 16 ستمبر ہی کو 02:00:04 pm پر ہوگا، واضح رہے کہ امریکا اور کینیڈا بہت بڑے ملک ہیں،بعض حصوں میں گرین وچ مین ٹائم سے فرق 5 گھنٹے کا ہے اور بعض حصوں میں 6 گھنٹے یا اس سے بھی زیادہ کا فرق ہے،اس فرق کو مدنظر رکھتے ہوئے مطلوبہ ٹائم میں کمی بیشی کی جاسکتی ہے۔

دنیاوی ضروریات کے پیش نظر ہم بعض آیات اور سورتوں کی زکات ادا کرنے کا ایک مختصر اور آسان طریقہ لکھ رہے ہیں جو ایک سال تک کارآمد ہوگا یعنی جس آیت یا سورة کی زکات دی جائے گی وہ ایک سال تک کارآمد ہوگی، آئندہ سال پھر کسی گرہن کے وقت پر اسے دہرالیں گے تو پھر ایک سال کے لیے اس کا اثر قائم ہوجائے گا۔

آپ اپنی ضرورت کے مطابق جو زکات چاہیں ادا کریں اور بعد میں اس سے کام لیں مگر خیال رہے کہ آپ کے مقاصد جائز ہوں اور ذاتی مفادات سے بالاتر ہوں، زیادہ سے زیادہ خلق خدا کی بھلائی پیش نظر رہے، اپنے ذاتی مقاصد میں بھی اپنی بے جا خواہشات اور حرص و ہوس، نام و نمود،جذبہ ءانتقام یا اشتعال اور غصے کے زیر اثر کوئی کام نہ کریں، جہاں صورت حال ناقابل برداشت ہوجائے اور اصلاح و درستگی کا مادی طور پر کوئی چارہ نہ رہے، وہاں اپنی ضروریات کے لیے بھی کام لے سکتے ہیں۔

زکات سورة اخلاص

سب سے پہلے ہم سورة اخلاص کی زکات کا طریقہ لکھ رہے ہیں۔ واضح رہے کہ اس سورة کا موضوع”توحید“ ہے، علماءاور صوفیا اس سورة مبارکہ کی تعریف کرتے ہوئے کبھی نہیں تھکتے، اس کی اہمیت اور فضیلت اور اس کے فوائد ہم کیا بیان کریں گے، ہمارے خیال میں تو ہر مسلمان اس سورة کی عظمت سے خوب واقف ہے، ہم صرف اتنا ضرور عرض کریں گے کہ اس سورة میں صرف 4 حرف نقطے والے ہیں، باقی تمام حروف صوامت یعنی بغیر نقطے والے ہیں، اس کے علاوہ ایک دلچسپ اور حیرت انگیز بات یہ بھی ہے کہ پوری سورة اخلاص کے کل اعداد 1002 ہیں، اس کا مجموعہ بھی 12 ہی ہوگا اور 12 کا مفرد عدد 3 ہے، اسم ذات اللہ کے اعداد 66 ہیں، 66 کا مجموعہ 12ہوگا اور مفرد عدد 3 ہوگا،حروف صوامت کے کل اعداد 543 ہیں، انہیں باہم جمع کیا جائے تو مجموعہ 12 ہوگا جس کا مفرد عدد بھی 3 ہوگا، یہ سب اتفاقات نہیں ہیں ، بے شک یہ اُس عظیم و برتر ذاتِ باری تعالیٰ کی حکمت عظیم کے نمونے ہیں جن میں بڑے اسرار پوشیدہ ہیں اور وہی لوگ ان اسرار و رموز سے واقف ہوتے ہیں جنہیں وہ خود توفیق دے۔

سورة اخلاص کے جفری اسرارورموز کے بعد اس کی زکات کا آسان اور سادہ طریقہ سمجھ لیجیے، گہن شروع ہونے سے قبل غسل کرکے پاک صاف ہوجائیں اور سفید لباس زیب تن کریں، کپڑوں میں عمدہ خوشبو لگائیں اور علیحدہ کمرے میں پاک صاف جگہ پر رجال الغیب کو پشت کی جانب یا بائیں سمت میں رکھ کر بیٹھیں۔

سب سے پہلے دو رکعت نماز نفل بہ نیت زکات برائے سورة اخلاص ادا کریں، اس کے بعد 11 بار درود شریف پڑھ کر 313 مرتبہ سورة اخلاص پڑھ لیں پھر گیارہ بار درود شریف پڑھیں۔

بس اتنا ہی کام ہے، زکات کا عمل مکمل ہوا، اب کچھ مٹھائی پر جو پہلے سے ساتھ لے کر بیٹھے ہیں، فاتحہ دیں اور حضور اکرم ﷺ اور تمام انبیاء، اولیاءو بزرگان دین کو ایصال ثواب کرکے اللہ سے اپنے اس عمل میں تاثیر کے لیے دعا کریں، اب روزانہ سات مرتبہ سورة اخلاص کو کسی ایک وقت پر پڑھ لیا کریں، سال بھر تک اس زکات کا اثر قائم رہے گا جس دن زکات ادا کریں گے اس دن سے سات دن کے اندر سات فقیروں کو اپنی جیب سے کھانا بھی کھلادیں یا توفیق ہو تو اس سے زیادہ صدقہ و خیرات کریں، یہ کام اگر ایک دن نہ کرسکیں تو 7 دن تک ایک فقیر کو روزانہ کھانا کھلادیں۔

اس زکات کی ادائیگی سے آپ سورة اخلاص کے عامل ہوگئے، اب اس سے کام لینے کے جو طریقے ہیں وہ یہ ہیں کہ ہر قسم کے حصار میں سورة اخلاص سے کام لے سکتے ہیں، اگر اپنے گھر کو آفات و بلیات، سحروآسیب سے محفوظ کرنا چاہتے ہیں تو رات کو سات بار پڑھ کر گھر کا انگلی کے اشارے سے حصار باندھ لیں، کوئی ماورائی یا مادی چیز بھی نقصان نہیں پہنچاسکے گی، گھر میں چوری ڈکیتی یا کسی حادثے کا خطرہ نہیں رہے گا، اگر گھر میں چیزیں چوری ہوتی ہیں یا جہاں آپ خفیہ پیسا رکھتے ہیں وہاں سے چوری کا خطرہ ہے تو تالا لگاتے ہوئے سات بار سورة اخلاص پڑھ کر تالے پر دم کردیا کریں، اگر سفر پر روانہ ہورہے ہیں تو سات بار پڑھ کر اپنے سینے پر دم کریں، دونوں ہتھیلیوں پر دم کرکے چہرے اور جسم پر ہاتھ پھیر لیں، حفاظت رہے گی، جسم کے کسی بھی حصے میں درد یا تکلیف محسوس ہو اپنے یا کسی دوسرے کے بھی تو سات بار پڑھ کر دم کریں تو تکلیف دور ہوگی۔

اگر آپ کا دشمن زبردست ہے،خطرہ ہے کہ وہ آپ کو نقصان پہنچائے گا تو اس کے سامنے جاتے ہوئے سات بار پڑھ لیں تو آپ اس کے شر سے محفوظ رہیں گے، شوہر یا بیوی میں سے کوئی بھی اگر کسی ایک فریق کے خلاف بدزبانی، زیادتی، مارپیٹ کرتا ہے تو اس کی زبان بندی یا مارپیٹ کو روکنے کے لیے ایک روٹی پر انگلی سے فرضی طور پر پوری سورةلکھیں، بعد میں اس کا نام مع والدہ بھی اسی طرح انگلی سے لکھیں اور اپنا مقصد لکھیں مثلاً زبان بندی، گالی گفتار کی پابندی، دست درازی، فضول خرچی، آوارہ گردی وغیرہ وغیرہ، پھر یہ روٹی اسے کھانے کے ساتھ کھلادیں، سات دن تک متواتر کھلائیں تو وہ اپنی بری حرکتوں سے انشاءاللہ باز آجائے گا، اسی طرح نافرمان اور سرکش بچوں کی اصلاح کے لیے بھی کرسکتے ہیں، روٹی کے علاوہ اگر زعفران وغیرہ سے کاغذ پر پوری سورة لکھ کر اپنا نام و مقصد لکھ کر اس کاغذ کو کسی پاک صاف پانی کی بوتل میں ڈال لیں اور وہ پانی پلائیں تو بھی یہ تمام فوائد حاصل کیے جاسکتے ہیں،ا گر کسی پر سحروجادو یا آسیب و جنات کے اثرات ہوں تو اس کو بھی نقش لکھ کر اور پانی میں گھول کر پلائیں، الغرض بے شمار مقاصد کے لیے اس سورة مبارکہ سے کام لیا جاسکتا ہے جو لوگ ہمارے طریقے کے مطابق سورة اخلاص کی زکات ادا کریں وہ ہمیں اس کی اطلاع اپنے نام مع والدہ کے ساتھ ضرور دیں اور اپنی ضرورتوں کے سلسلے میں اگر مزید اس سورة سے کام لینے کے طریقے سمجھنا چاہیں تو خط و کتابت کے ذریعے مشورہ کرسکتے ہیں۔

اس موقع پر سورة فلق یا سورة ناس کی زکات بھی اسی طرح ادا کی جاسکتی ہے، جو لوگ سحروجادو، آسیب و جنات کے علاج کا کام کرتے ہوں، انہیں یہ زکات ادا کرنی چاہیے۔

اسم الٰہی القابض کی زکات

اسمائے الٰہی میں اسم الٰہی ”القابض“ کی زکات بھی گرہن میں دی جاسکتی ہے، اس اسم کے اعداد ابجد قمری سے 903 ہیں، اس کا مفرد عدد 3 ہے، روک تھام اور بندش کے معاملات میں یہ اسم الٰہی نہایت مو ¿ثر ہے ، بری عادتوں سے روکنے، ظالم سے محفوظ رہنے اور دشمن کو اس کے ناپاک اور ناجائز ارادوں سے باز رکھنے کے لیے اس اسم کی تاثیر سے فائدہ اٹھایا جاتا ہے، گرہن کے وقت اوپر بیان کی گئی شرائط کے مطابق اس اسم کو 313 مرتبہ پڑھ لیں تو ایک سال کے لیے اس کی زکات ادا ہوجائے گی اور پھر اس اسم کی روحانیت سے کام لینا آسان ہوگا مگر خیال رہے کہ یہ اسم نہایت زبردست ہے، صاحب زکات کو ہمیشہ احتیاط و پرہیز کرنا لازم ہوگا، احتیاط و پرہیز میں سرفہرست ذہن و قلب کی صفائی ہے اور حقوق العباد کی ادائیگی ہے، ناجائز اور حرام امور سے گریز ، بصورت دیگر عامل خود نقصان اٹھاسکتا ہے، زکات کی ادائیگی کے بعد اس اسم کا نقش مثلث خاکی چال سے لکھ کر اور ساتھ ہی مقصد لکھ کر استعمال میں لایا جائے، ہمارا طریقہ یہ ہے کہ اسم الٰہی القابض کا مثلث نقش خالی البطن استعمال میں رکھا جائے اور درمیان کے خالی خانے میں نام و مقصد تحریر کردیا جائے، اس وقت مثال دے کر سمجھانے کی گنجائش نہیں ہے، جو لوگ زکات ادا کریں، نقش بھرنے کا طریقہ سیکھیں، اس کے علاوہ کسی بھی قسم کی روک تھام یا بندش کے لیے پڑھائی کے طریقے تقریباً وہی ہوں گے جو سورة اخلاص کے سلسلے میں بیان کیے گئے ہیں۔

ایک نادر عمل تسخیر

یہ عمل ان لوگوں کے لیے بیش بہا تحفہ ہے جن کا کوئی عزیز ، رشتے دار، بیوی یا شوہر ناراض ہو یا ان سے دور بھاگتا ہو اور کسی طرح واپس آنے کا نام نہ لیتا ہو یا پھر ملازمت پیشہ افراد اپنے کسی افسر اعلیٰ کی سختیوں اور زیادتیوں سے پریشان ہوں، وہ اس کی ترقی میں رکاوٹ بن رہے ہوں یا علاقے کا کوئی با اثر اور طاقت ور شخص مخالف ہوگیا ہو اور اس سے تعلقات بہتر کرنا مقصود ہوں تو ایسی صورت میں یہ عمل انشاءاللہ صورت حال کو بہتر بنانے میں معاون ثابت ہوگا، اس عمل کو اس سورج گرہن کے علاوہ چاند گرہن یا ایسے قمر در عقرب میں کیا جاسکتا ہے جو چاند کی آخری تاریخوں میں رات کے وقت ہو۔

طریقہ عمل یہ ہے کہ علیحدہ پاک صاف کمرے میں رجال الغیب سے منہ پھیر کر بیٹھیں، کپڑوں پر خوشبو لگائیں اور بخور لوبان کا جلائیں، مٹی کا ایک پیالہ جو بالکل کورا ہو یعنی اسے پہلے قطعی استعمال نہ کیا گیا ہو، پہلے سے لاکر رکھیں اور ایک عدد لال اینٹ بھی مہیا کرلیں، گیارہ بار درود شریف پڑھنے کے بعد پیالے کو پانی سے بھرلیں اور اس کے بعد سات مرتبہ سورة واللیل اور ایک مرتبہ سورة اذا زلزت العرض پڑھ کر آہستہ آواز آواز میں کہیں ”بستم بستم خواب و خود فلاں بن فلاں (نام مطلوب مع والدہ فلاں بن فلان کی جگہ لیں) فی حق فلاں بن فلاں (اپنا نام مع والدہ لیں) جب تک میں نہ کھولوں کوئی نہ کھول سکے، بحق ایں سورة ہائے مبارکہ“

اب پانی پر دم کردیں اور تمام پانی خود ہی پی جائیں پھر اس پیالے کو اپنے سرہانے رکھ کر لال اینٹ اس کے اوپر رکھ دیں، گویا خالی پیالے پر ڈھکن رکھ دیا ہو، اس کے بعد سوجائیں، عمل کے بعد قطعی کسی سے بات چیت نہ کریں، انشاءاللہ وہ شخص آپ کی طلب میں بے قرار ہوگا اور ضرور آپ تک پہنچنے کی کوشش کرے گا، یا رفتہ رفتہ اس کے رویے میں مثبت تبدیلی ظاہر ہوگی۔

صبح اٹھ کر پیالے اور اینٹ کو کسی ایسی جگہ دفن کردیں جو نمناک ہو، ساحل سمندر کے کنارے یا کسی دریا یا نہر کے کنارے، یہ عمل گرہن کے دن سے شروع کرکے سات روز تک کرنا ہے، اس عمل کے لیے اس گہن کا انتخاب کریں جو رات میں لگ رہا ہو، اگر خواتین یہ عمل کریں تو وہ پیالے اور اینٹ کو کسی اور کے ہاتھ سے دفن کراسکتی ہیں، یہ بھی ضروری نہیں ہے کہ سوکر اٹھنے کے فوراً بعد ہی پیالہ اور اینٹ کو دفن کرنے کے لیے دوڑ لگادیں، انہیں اٹھاکر کسی کپڑے میں لپیٹ کر احتیاط سے رکھ دیں اور دوسرے دن کسی بھی وقت دفن کرادیں، اگر مطلوبہ شخص کا کوئی استعمال شدہ کپڑا میسر آجائے اور وہ پیالے پر پلیٹ دیں تو سونے پر سہاگا ہوگا، دوسرے دن سے رات کے وقت ہی کا انتخاب کریں یعنی یہ کام رات کو سونے سے پہلے کریں اور پھر صبح اٹھ کر اینٹ اور پیالے کو دفن کرادیا کریں، ساتویں دن جو آخری ہوگا، پیالے کو دفن کرانے کے بعد کچھ مٹھائی پر فاتحہ دیں اور حسب توفیق صدقہ و خیرات کریں یا غریبوں کو کھانا کھلائیں۔

عزیزان من! اس عمل میں معمولی سی مشقت، پابندی ضرور ہے مگر اس کا صلہ بھی بہت بڑا ہے، عمل میں دشواریوں کے پیش نظر ہم کچھ اور اوقات کی بھی نشان دہی کر رہے ہیں جو اس عمل کے لیے موزوں ہوں گے۔

عمل کے دوران کوئی خاص پرہیز نہیں ہے، سوائے اس کے کہ پاک صاف رہیں، مزید یہ کہ انتہائی شدید ضرورت اور جائز مقاصد کے لیے کریں، نجی نوعیت کی ایسی خواہشات کے لیے نہ کریں جن کے بغیر بھی بہر حال زندگی گزر سکتی ہے۔

تالے والا مشہور عمل

اس سلسلے میں نہایت مشہور ہمارا ”تالے والا“ عمل ہے جس سے ہزاروں افراد فائدہ اٹھا چکے ہیں اور اس عمل کے لیے گہن کے وقت کا انتظار کرتے ہیں، اس کا طریقہ کئی بار لکھا گیا ہے، ہماری کتاب مسیحا میں بھی موجود ہے لیکن نئے قارئین کی سہولت کے لیے پُرزور فرمائش پر دوبارہ لکھ رہے ہیں۔ یہ عمل خاص طور سے دو افراد خصوصاً میاں بیوی کے درمیان اتفاق و محبت کے لیے نہایت پرتاثیر ہے اور ذہانت سے کام لیا جائے تو دیگر مقاصد کے لیے بھی کیا جاسکتا ہے‘ مثلاً کسی برائی سے روکنا یا کسی بری عادت کی بندش کے لیے بھی یہ عمل کیا جا سکتا ہے مگر اس کے لیے مقصد کو مناسب طریقے سے بیان کرنا ہوگا۔

گہن کے وقت سے پہلے ایک کورا یعنی نیا تالا جو استعمال شدہ نہ ہو، لا کر رکھ لیں، تالا اسٹیل کا ہو اور چابی سے کھلتا اور بند ہوتا ہو تو زیادہ بہتر ہے۔ 

گہن کے وسطی حصے سے کچھ پہلے با وضو علیحدہ کمرے میں بیٹھ جائیں ،تالا کھول کر ہاتھ میں رکھیں اور بسم اللہ کے بعد سات مرتبہ سورہ کوثر پڑھیں، بعدازاں زبان سے یہ جملہ ادا کریں۔

”بَستَم خواب و خود فلاں بن فلاں فی حق فلاں بن فلاں جب تک نہ دیکھے چین نہ پائے“

یہ جملہ سورہ کوثر پڑھنے کے بعد زبان سے ادا کریں اور تالے کے سوراخ میں پھونک مار کر تالا بند کر دیں، ذہن میں اپنے مقصد کا بھرپور تصور رکھیں اس کے بعد اگر مطلوب کا استعمال شدہ کپڑا میسر ہو تو تالے کو اس میں لپیٹ دیں اور گھر میں کسی ڈبے میں بند کر کے رکھ دیں یا کسی اندھیری جگہ تالے کو رکھ دیں۔ اس کے علاوہ تالے کو کسی قبرستان میں بھی دفن کر سکتے ہیں۔ تالے کی چابی ضائع کر دیں۔

 بس اتنا سا کام ہے‘ اس کام سے فارغ ہو کر کچھ مٹھائی پر فاتحہ دیں اور اللہ سے کامیابی کے لیے دعا کریں، مٹھائی خود بھی کھائیں اور بچوں میں یا احباب میں تقسیم کر دیں، تین کلو چاول اور تین کلو چینی کا صدقہ دیں یا 300 روپے خیرات کر دیں، انشاءاللہ اس شخص کے دل میں محبت اور نرمی پیدا ہو گی، اگر وہ کہیں دور ہے تو یقینا واپس آئے گا، خیال رہے کہ محض تفریحاً یا معمولی وجوہات کی بنیاد پر یہ عمل ہر گز نہ کریں، انتہائی شدید ضرورت اور مجبوری کے تحت کیا جائے جو لوگ معمولی معمولی باتوں پر جذباتی ہو کر عمل و وظیفے کرتے ہیں ‘ انہیں حقیقی استحقاق حاصل نہ ہونے کی وجہ سے ناکامی ہوتی ہے اور پھر وہ کہتے ہیں کہ عمل میں اثر نہیں تھا حالانکہ انہیں سوچنا چاہیے کہ وہ خود غلطی پر تو نہیں ہیں؟ 

جملے میں فلاں بن فلاں کی جگہ مطلوب کا نام مع والدہ مثلاً احمد بن فاطمہ لیا جائے گا، اگر مطلوب عورت ہے تو بن کی جگہ بنت کا لفظ استعمال ہو گا۔ دوسری جگہ فلاں بن فلاں کے بجائے طالب کا نام مع والدہ لیا جائے گا۔ امید ہے تمام طریقہ سمجھ میں آ گیا ہو گا۔

میاں بیوی میں محبت کے لیے عمل خاص

زن و شوہر میں اختلافات، مزاجی ناہمواری، باہمی لڑائی جھگڑا، محبت کی کمی وغیرہ کے لیے یہ ایک مجرب طریقہ ہے اور صرف شادی شدہ خواتین و حضرات ہی اس سے فائدہ اٹھا سکتے ہیں۔ نہایت آسان بھی ہے۔ گرہن کے درمیانی وقت میں ایک سفید کاغذ پر کالی یا نیلی روشنائی سے پوری بسم اﷲ لکھ کر سورہ الم نشرح پوری لکھیں پھر یہ آیت لکھیں۔

والقیت علیک محبة فلاں بن فلاں (یہاں مطلوب کا نام مع والدہ لکھیں) علیٰ محبة فلاں بنت فلاں (یہاں طالب کا نام مع والدہ لکھیں) کما الفت بین آدم و حوا و بین یوسف و زلیخا و بین موسیٰ و صفورا و بین محمد و خدیجة الکبریٰ و اصلح بین ھما اصلاحاً فیہ ابداً

اب تمام تحریر کے ارد گرد حاشیہ ( چاروں طرف لکیر) لگا کر کاغذ کو تہہ کر کے تعویز بنا لیں اور موم جامہ کر کے بازو پر باندھ لیں یا پھر اپنے تکیے میں رکھ لیں۔

خیال رہے کہ مندرجہ بالا نقوش لکھتے ہوئے باوضو رہیں، پاک صاف کپڑے پہنیں، علیحدہ کمرے کا انتخاب کریں، لکھنے کے دوران مکمل خاموشی اختیار کریں اور اپنے مقصد کو ذہن میں واضح رکھیں کہ آپ کیا چاہتے ہیں، رجال الغیب کا خیال رکھیں کہ آپ جس طرف رخ کر کے بیٹھے ہوں وہ آپ کے سامنے نہ ہوں، رجال الغیب کا نقشہ کئی بار شائع کیا جاچکا ہے۔

ناجائزو ناپسندیدہ تعلق کا خاتمہ

اکثر والدین اپنے بیٹے یا بیٹی کی ایسی محبت یا وابستگی سے پریشان رہتے ہیں جو ان کے نزدیک ناپسندیدہ ہوتی ہے اور وہ سمجھتے ہیں کہ ان کا لڑکا یا لڑکی ایک غلط راستے پر چل رہے ہیں۔ 

 ایسی صورت میں طریقہ یہ ہے کہ گہن کے وقت کسی علیحدہ کمرے میں باوضو بیٹھ کر مندرجہ ذیل سطور کسی سفید کاغذ پر کالی یا نیلی روشنائی سے لکھیں اور کا غذ کو تہہ کر کے تعویذ کی شکل بنا لیں اور پھر اس کاغذ کو کسی بھاری وزنی چیز کے نیچے دبا دیں یا قبرستان میں دفن کردیں، انشاءاللہ دونوں کے درمیان علیحدگی ہوجائے گی۔

”احد رسص طعک لموہ لادیا یا غفور یا غفور بستم تعلق فلاں بن فلاں و بین فلاں بن فلاں عَقدَت قُلوبِھم ابداً یا حراکیل بحق یا قابض یا مانع العجل العجل الساعة الساعة“

تاریخ ساز امریکی انتخابات، کامیابی و ناکامی کے امکانات

ڈونلڈ ٹرمپ اور ہیلری کلنٹن کی شخصیت اور کردار زائچہ ءپیدائش کی روشنی میں

امریکا کے صدارتی انتخابات کے لیے امیدواروں کی باہمی رسا کشی اپنے اختتام کو پہنچی اور بالآخر 2 امیدوار اب میدان میں آمنے سامنے ہیں، ری پبلکن پارٹی کے ڈونلڈ ٹرمپ اور ڈیموکریٹک صدارتی امیدوار کے طور پر محترمہ ہیلری کلنٹن کا نصیب جاگ اُٹھا ہے، اس سے پہلے بھی وہ صدارتی امیدوار کے طور پر نامزدگی حاصل کرنے کی کوشش کرچکی ہیں لیکن ان کے مقابلے میں بارک اوباما کامیاب رہے تھے اور وہ صدر اوباما کے پہلے دور میں وزارت خارجہ کا قلم دان حاصل کرنے میں کامیاب رہی تھیں، اس میں کوئی شک نہیں کہ ہیلری کلنٹن ایک غیر معمولی صلاحیتوں کی حامل خاتون ہیں اور ساتھ ہی خوش قسمت بھی ہیں، چناں چہ زندگی میں بہت سے اعزازات اب تک حاصل کرچکی ہیں اور اب امریکا کے سب سے بڑے اعزاز کی جانب پیش قدمی کر رہی ہےں، امریکا کی تاریخ میں اب تک کوئی خاتون یہ اعزاز حاصل نہیں کرسکی ہے۔

ڈونلڈ ٹرمپ صدارتی انتخاب کے میدان میں قدم رکھتے ہی ایک متنازع شخصیت کے طور پر سامنے آئے ہیں، وقتاً فوقتاً وہ ایسے بیانات دیتے رہے ہیں جو کسی نہ کسی تنازع کا باعث بنے ہیں،اب جب کہ وہ باقاعدہ طور پر ایک ری پبلکن صدارتی امیدوار بن چکے ہیں، انہوں نے پھر ایک ایسا بیان دے دیا جس پر تمام امریکا میں چہ مہ گوئیاں ہورہی ہیں،کہا جاتا ہے کہ وہ ماضی میں بھی اپنی بعض غیر اخلاقی یا جنونی حرکتوں کے لیے مشہور رہے ہیں۔

امریکی انتخابات سے امریکیوں کی دلچسپی تو ایک فطری بات ہے لیکن پاکستانیوں کی دلچسپی بھی کسی طرح کم نہیں ہے، پاکستانی بڑی تعداد میں امریکا میں بھی مقیم ہیں اور پاکستان میں رہنے والے بھی ہمہ وقت کسی نہ کسی وجہ سے امریکا کی طرف دیکھنے پر مجبور ہیں ، چناں چہ اپنے قارئین کی دلچسپی کے لیے ہم یہاں دونوں صدارتی امیدواروں کی شخصیت و کردار اور آئندہ کامیابی یا ناکامی کے امکانات کا جائزہ لیں گے۔

ہیلری کلنٹن

امریکا کی سابق خاتون اول اور وزیر خارجہ محترمہ ہیلری کلنٹن 26 اکتوبر 1947 کو شکاگو میں صبح 08:45 am پر پیدا ہوئیں، ایک مشہور شخصیت ہونے کی بناءپر دنیا بھر میں مختلف منجم ان کا زائچہ ءپیدائش بناچکے ہیں، ویسٹرن سسٹم کے مطابق بھی اور ویدک سسٹم کے مطابق بھی۔

محترمہ کا برتھ سائن ویدک سسٹم کے تحت عقرب 7 درجہ 26 دقیقہ ہے، سیارہ مشتری 7 درجہ 23 دقیقہ برج عقرب میں موجود ہے اور نہایت طاقت ور پوزیشن میں طالع کے درجات سے قران کر رہا ہے اور اس کے ساتھ ہی پانچویں (شعور، خوشیاں، اولاد، محبت)، ساتویں (تعلقات، شریک حیات) اور نویں (قسمت، آئین و قانون، مذہب، بیرون ملک تعلقات) پر بھی نہایت سعد اثر ڈال رہا ہے،مشتری زائچے کے دوسرے گھر کی مول ترکون کا حاکم ہے جس کا تعلق اسٹیٹس اور فیملی سے ہے،اگر یہ کہا جائے تو غلط نہیں ہوگا کہ پورا زائچہ مشتری کی غیر معمولی سعادت کے سبب رنگین و پرلطف ہوگیا ہے کیوں کہ اس کے علاوہ باقی دیگر سیارگان اتنے اہم نہیں ہیں۔

 سیارہ زحل نویں گھر میں اچھی جگہ ہے مگر کمزور ہے،سیارہ قمر برج حوت میں کمزور ہے، حالاں کہ یہ نویں گھر کا حاکم ہے،سیارہ مریخ بھی نویں گھر میں اپنے برج ہبوط میں ہے،دسویں گھر کا حاکم شمس بارھویں گھر میں اپنے برج ہبوط میں ہے لیکن نواں گھر مشتری کی طاقت ور نظر سے تقویت پارہا ہے،بارھویں گھر کا حاکم زہرہ اپنے ہی گھر میں مضبوط پوزیشن رکھتا ہے،اس پر چھٹے گھر کے حاکم سیارہ مریخ کی نظر ہے جو ازدواجی زندگی کی خوشیوں میں کمی اور فتنہ و فساد کی نشان دہی ہے، گیارھویں گھر کا حاکم عطارد بھی بارھویں گھر میں ہے،راہو ساتویں ، کیتو پہلے گھر میں ہے اور کمزور قمر پر نظر ڈال رہا ہے،اس تمام صورت حال میں صرف مشتری ہی ایسا سیارہ ہے جو زائچے کے نہایت اہم اور فائدہ بخش گھروں کو مکمل سپورٹ دے رہا ہے،اگر یہ صورت نہ ہوتی تو ہیلری کلنٹن ایک عام سی مصیبت کی ماری خاتون ہوتیں،مشتری عورت کے زائچے میں شوہر کا نمائندہ بھی ہے لہٰذا مشتری کی بھرپور پوزیشن سے ہیلری کو ایک شاندار کرئر رکھنے والا شوہر ملا جو امریکا کا دو بار صدر بنا اور ہیلری کو وہائٹ ہاو ¿س جیسی شاندار تاریخی عمارت میں 8 سال گزارنے کا موقع مل سکا، اپنی تمام خوبیوں کے باوجود ہیلری کے شوہر ایک دل پھینک عاشق کے طور پر مشہور ہوئے،اس کی وجہ چھٹے اور بارھویں گھروں کے حاکموں یعنی مریخ اور زہرہ کا باہمی تعلق ہے۔

حیرت کی بات یہ ہے کہ ایک عقرب عورت کسی صورت بھی بے وفائی برداشت نہیں کرسکتی،برج عقرب ایک نہایت حساس اور گہری جذباتیت کا حامل سائن ہے،عقربی افراد محبت و نفرت میں خاصے شدید ہوتے ہیں،مزید یہ کہ قمری برج بھی حوت ہے اور زائچے میں کثرت کواکب واٹر سائن میں ہے،اس کا مطلب یہ ہے کہ ہیلری بنیادی طور پر نہایت شدت پسندانہ جذبات و نظریات کی حامل ہیں،ہمیں یقین نہیں ہے کہ انہوں نے مسٹر کلنٹن کی بے وفائیوں کو دل سے معاف کیا ہوگا۔

ایک عقرب عورت تن، من، دھن سے اپنے محبوب یا شوہر کی وفادار ہوتی ہے اور وقت پڑنے پر وہ شوہر کے لیے بڑی سے بڑی قربانی دینے سے گریز نہیں کرتی لیکن اگر شوہر کی بے وفائی کا سامنا ہو تو پھر وہ اسے معاف نہیں کرتی اور اپنے لیے بھی دوسرے راستے کھولنے کے بارے میں سوچ سکتی ہے،ممکن ہے ہیلری کی سیاسی میدان میں سرگرمیاں (صدر کلنٹن کی ریٹائرمنٹ کے بعد) ایسی ہی کسی خلش کا نتیجہ ہوں 

سوز غم دے کے مجھے اُس نے یہ ارشاد کیا

جا تجھے کشمکشِ دہر سے آزاد کیا

قمر زائچے کے پانچویں گھر میں واٹر سائن برج میں ہے اور پیدائشی نچھتر (قمری منزل) پرو بھدرپد ہے، اس نچھتر پر بھی سیارہ مشتری حکمران ہے جو ایک دانش مندانہ شعور عطا کرتا ہے،اس نچھتر کے زیر اثر پیدا ہونے والے افراد کا بنیادی محرک مادّی ترقی ہے ، ان لوگوں میں مستقبل کے لیے ایک آئیڈیل یا وژن پر فوکس کرنے کی مضبوط خواہش موجود ہوتی ہے،یہ لوگ عالمی اہداف کے لیے کام کرنا پسند کرتے ہیں تاکہ انسانیت کا بول بالا ہو، بہت آزاد اور خود انحصار ہوتے ہیں، ایک گہری فلسفیانہ دانائی اور سوچ کی اوریجنلٹی کے حامل ہوتے ہیں،سماجی اصولوں، بندشوں سے دور بھاگنا پسند کرتے ہیں،یہ لوگ اپنے ہی طبلے کی تھاپ پر رقصاں رہتے ہیں اور اپنی ہی دھن میں مگن، اپنے ہی راستے پر گامزن، اپنی ہی منزل کی جانب سفر کرنا پسند کرتے ہیں اور اس خیال پر یقین رکھتے ہیں کہ ”شکست خوردہ راستے، شکست خوردہ لوگوں کے لیے ہوتے ہیں“۔

ہم کہہ سکتے ہیں کہ ہیلری کلنٹن کی پرو بھدر میں پیدائش انہیں تھوڑا سا پیچیدہ بناتی ہے،ایسے لوگوں کو ”دو چہرہ“ بھی کہا جاتا ہے،وہ مسائل کو مختلف نکتہ نظر سے دیکھنے کے قائل ہوتے ہیں جس کی وجہ سے دوسروں کو دو چہرہ لگ سکتے ہیں۔

یہ لوگ آسانی سے ذہنی دباو ¿ کا شکار ہوسکتے ہیں لیکن ایمانداری اور خلوص ان کی اہم خصوصیات ہیں، آپ ان کا شمار ان لوگوں میں کرسکتے ہیں جو راست بازی اور اصولوں پر یقین رکھتے ہیں،خداداد قائدانہ صلاحیتوں کے مالک دوسروں سے کام لینے کے اہل ہوتے ہیں،اگرچہ یہ لوگ عالمی انسانیت کے علم بردار ہوتے ہیں لیکن اُس وقت تک کسی کی مدد کرنے کے لیے آگے نہیں بڑھتے، جب تک کہ قائل نہ ہوجائیں کہ دست سوال دراز کرنے والا واقعی مہربانی اور ہمدردی کا حق دار ہے۔

اس نچھتر کے زیر اثر پیدا ہونے والے دنیا کے دیگر مشہور افراد میں عظیم پیش گو ناسٹرا ڈیمس، مارٹن لوتھر کنگ جونیئر، سائنس داں مادام میری کیوری، ہیلن کیلر، پاپ سنگر مائیکل جیکسن، کھلاڑی و ادکار اوجے سمپسن وغیرہ شامل ہیں۔

ڈونلڈ ٹرمپ

موجودہ صدارتی انتخاب کی متنازع شخصیت مسٹر ڈولنڈ ٹرمپ 14 جون 1946 ءکو جمیکا میں صبح 10:54 am پر اس جہان فانی میں تشریف لائے، ویدک سسٹم کے مطابق ان کا شمسی برج ثور ہے اور برتھ سائن اسد (Leo) ہے جب کہ قمری برج عقرب اور پیدائشی نچھتر جیشیٹھا ہے۔

برج اسد کو بادشاہوں کا برج کہا جاتا ہے،طالع کے درجات 6 درجہ 51 دقیقہ ہیں اور سیارہ مریخ برج اسد میں طالع کے درجات سے قران کر رہا ہے،مشتری دوسرے گھر میں برج سنبلہ میں ہے اور راہو کی نظر کا شکار ہے،چوتھے گھر میں کیتو اور قمر حالت قران میں ہےں،دسویں گھر میں راہو اور شمس حالت قران میں ہیں گویا راہو کیتو محور کے ساتھ زائچے کے دو اہم سیارگان قمر اور شمس بری طرح متاثرہ ہیں، دوسرے گھر کا حاکم سیارہ عطارد گیارھویں گھر میں طاقت ور پوزیشن رکھتا ہے،گویا اس زائچے کا سب سے زیادہ سعد و باقوت سیارہ عطارد ہے،زہرہ اور زحل بارھویں گھر میں ہےں۔

بے شک اسد افراد شاہانہ مزاج ، فیاض، بالغ نظر اور بہت سی دیگر اعلیٰ صفات کے حامل ہوتے ہیں،خاص طور پر انتظامی صلاحیتیں بھرپور ہوتی ہیں، یہ لوگ اپنے ذاتی بزنس میں بہت ترقی کرتے ہیں لیکن کسی بھی زائچے میں کسی بھی برج کی بنیادی خصوصیات میں منفی یا مثبت اثرات کا جائزہ لینے کے لیے اس برج کے حاکم کی پوزیشن دیکھی جاتی ہے،مزید یہ کہ اس برج پر دیگر سیارگان کے اثرات کس نوعیت کے ہیں، چناں چہ ہم دیکھتے ہیں کہ برج اسد کا حاکم سیارہ شمس کمزور ہے اور راہو کیتو محور میں پھنس کر برج اسد کی مثبت خصوصیات کو تباہ کر رہا ہے،راہو سے قران اور کیتو سے مقابلہ ، بالغ نظری کے بجائے کینہ پروری اور دیگر منفی کمزوریوں کی نشان دہی کر رہا ہےگویا وہ حصول مقاصد کے لیے جائز و ناجائز کی پروا کرنے والے نہیں ہیں، راہو کی مشتری پر بھی نظر ہے جو پانچویں شعور کے گھر کا حاکم ہے لہٰذا ہم کہہ سکتے ہیں کہ صاحب زائچہ کا شعور بھی منفی اثرات سے پاک نہیں ہے، البتہ راہو اور مشتری کی نظر ایسے بزنس میں بے پناہ کامیابی کا باعث ہوسکتی ہے جو اسلامی نظریات کے مطابق ناجائز قرار پاتے ہیں، مثلاً شراب کا کاروبار، جوئے سٹے کا بزنس وغیرہ جو بہر حال امریکا میں ناجائز کاروبار کے زمرے میں نہیں آتا۔

مریخ نویں گھر کا حاکم ہوکر طالع کے درجات سے قران کر رہا ہے،جس کے نتیجے میں مذہبی اور نظریاتی انتہا پسندی نمایاں ہوتی ہے،اس کی ایک وجہ قمر اور شمس کے ساتھ کیتو کے نظرات بھی ہیں۔

قمر برج عقرب میں ہبوط یافتہ اور راہو کیتو سے متاثرہ ہوکر فطری طور پر حسد ، جیلسی ، تنگ نظری اور دیگر اخلاقی برائیوں کو جنم دیتا ہے،چوں کہ برج عقرب ایک واٹر سائن ہے اور قمر یہاں ہبوط کا شکار ہوتا ہے،قمر کا تعلق دماغ سے ہے لہٰذا ایسے افراد راہو، کیتو کے اثرات کی وجہ سے اگر ذہنی اور نفسیاتی مریض بن جائیں تو حیرت نہیں ہونی چاہیے، اب تک اخبارات میں موصوف کے بارے میں جو جنونی نوعیت کے قصے سامنے آئے ہیں وہ قمر کی اس خرابی کی وجہ سے ہےں۔

سونے پر سہاگا یہ کہ قمر چاند کی منزل جیشٹھا میں ہے،یہ بڑا ہی جارحیت پسند اور جنونی نچھتر ہے جو انسان کو خواہشات کا غلام بناتا ہے، اگرچہ اس پر ذہانت کے سیارے عطارد کی حکمرانی ہے لیکن زائچے کی دیگر آراستگی کا رُخ منفی ہے لہٰذا غیر معمولی ذہانت کا رُخ بھی منفی ہوگا، مشہور امریکی ارب پتی ہاورڈ ہیوز کی پیدائش بھی اسی نچھتر میں ہوئی تھی جو ”خبطی ارب پتی“ کے نام سے مشہور ہوا، ان لوگوں میں منفی اثرات کی وجہ سے عجیب و غریب عادتیں یا رجحانات پیدا ہوتے ہیں جو ابتدائی زندگی میں ہی نمایاں ہونے لگتے ہیں، ان کا حلقہ ءاحباب محدود ہوسکتا ہے یا وہ تنہائی پسند اور دوسروں سے الگ تھلگ رہنے لگتے ہیں،ایک گُھنی یا منافقانہ فطرت کا مشاہدہ اس نچھتر کی خصوصیات میں کیا جاسکتا ہے،ایک عجیب تضاد یہ بھی ہوسکتا ہے کہ سختی سے مذہب کی پیروی کرتے ہیں اور اس کے ساتھ ہی مادّی آسائشوں کے متوالے بھی ہوتے ہیں،اس نچھتر کا بنیادی محرک مادّی ترقی اور فطرت راکھشس ہے، یہ لوگ خود خیالی اور خود توقیری کے مابین ایک باطنی جنگ میں مصروف رہتے ہیں،ایسٹرولوجی ایسے لوگوں کو گھمنڈ ، تکبر اور انانیت کی روک تھام کرنے کا مشورہ دیتی ہے،یہ لوگ چڑچڑے، بدمزاج اور جھگڑالو فطرت کے ہوسکتے ہیں،بے شک یہ اپنی غیر معمولی صلاحیتوں کے سبب اعلیٰ مقام تک رسائی حاصل کرلیتے ہیں۔

اس نچھتر کے زیر اثر پیدا ہونے والی دیگر مشہور شخصیات میں عیسائی فرقے کا بانی مارٹن لوتھر، ماہر فلکیات کوپر نیکس، اطالوی فلسفی نطشے، جرمن موسیقار موزارٹ، عظیم مصور ونسٹ وین گوگ، خبطی ارب پتی ہاورڈ ہیوز، بدنام زمانہ لارنس آف عربیہ،جرائم پیشہ الپسینو، بھارتی وزیراعظم اٹل بہاری واج پائی،پاکستانی سیاست داں اور دانش ور رسول بخش پلیچو وغیرہ شامل ہیں۔ 

شکست و فتح

حسب دستور امریکا میں الیکشن کا آخری معرکہ 4 نومبر کو ہوگا، مسٹر ڈونلڈ کے زائچے میں راہو کا دور اکبر جاری ہے،راہو سیاست کا ستارہ ہے،شاید اسی وجہ سے وہ میدان سیاست میں ایک طویل عرصے سے سرگرم ہےں، سب پیریڈ سیارہ مریخ کا جاری ہے جو نویں گھر کا حاکم اور قسمت کا ستارہ ہے،بے شک زائچے میں اچھی جگہ واقع ہے لیکن کمزور ہے، اچھی جگہ واقع ہونے کی وجہ سے وہ مسٹر ڈونلڈ کو الیکشن کے فائنل مرحلے تک لے آیا ہے،مریخ کا سب پیریڈ 29 اکتوبر 2015 ءسے شروع ہوا تھا اور 16 نومبر 2016 ءتک جاری رہے گا، اس کے بعد زائچے میں مشتری کا مین پیریڈ اور سب پیریڈ شروع ہوجائے گا، ٹرانزٹ کرتے ہوئے سیارے عین وقت پر کرشمہ سازی دکھاتے ہیں، قسمت کا ستارہ مریخ جو سب پیریڈ کا بھی حاکم ہے،4 نومبر کو زائچے کے چھٹے گھر میں ہوگا لہٰذا خوش قسمتی مسٹر ڈونلڈ سے دور ہوگی، زائچے کا سب سے منحوس سیارہ قمر پانچویں اور گیارھویں کو ناظر ہوگا، اس کا مطلب یہ ہے کہ انہیں وہ خوشیاں نہیں مل سکیں گی جن کی وہ توقع کر رہے ہیں یا وہ اپنا مطلوبہ ہدف حاصل نہیں کرسکیں گے۔

دوسری طرف ہیلری کلنٹن کی پوزیشن زیادہ مضبوط نظر آتی ہے،ان کے زائچے میں دسویں گھر کے حاکم سیارہ شمس کا مین پیریڈ چل رہا ہے اور سب پیریڈ سیارہ مشتری کا 26 ستمبر 2016 ءسے شروع ہوگا، مشتری ان کے زائچے کا گولڈن اسٹار ہے اور زائچے میں طاقت ور پوزیشن رکھتا ہے، جیسا کہ پہلے بیان کیا گیا ہے کہ وہ آج جو کچھ بھی ہیں ، زائچے میں مشتری کی اچھی پوزیشن کے باعث ہیں،4 نومبر کی صبح تقریباً 8 بج کر کچھ منٹ پر طالع برج عقرب طلوع ہوگا، یہ اُن کا ذاتی برج ہے،قمر جو اُن کی قسمت کا ستارہ ہے، زائچے کے دوسرے گھر میں ہوگا اور گھر کے درجات سے ناظر ہوگا، دوسرا گھر اسٹیٹس کا ہے،گویا وہ اپنی زندگی کا ایک نیا اسٹیٹس حاصل کرنے میں کامیاب ہوسکتی ہیں اور امریکا کی تاریخ بدل سکتی ہیں جس میں آج تک کوئی خاتون ملک کی صدر نہیں بنی ۔

عزیزان من! دونوں صدارتی امیدواروں کے زائچوں کا تجزیاتی جائزہ آپ کے سامنے پیش کردیا گیا ہے اور وضاحت کے ساتھ ٹیکنیکل معاملات کی بھی نشان دہی کردی گئی ہے جو بہر حال ہیلری کلنٹن کی کامیابی کا امکان ظاہر کر رہے ہیں،دونوں افراد کے زائچوں کی روشنی میں اُن کی شخصیت اور کردار پر بھی بات کی گئی ہے،اس اعتبار سے ہیلری کا صدارتی الیکشن جیتنا صرف امریکا کے لیے ہی نہیں ، باقی دنیا کے لیے بھی ایک نیک شگون ہوگا(واللہ اعلم بالصواب)۔