چودہ سے20 جون تک محتاط روی اختیار کرنے کی ضرورت
اس گرم موسم میں رمضان المبارک کی آمد یقیناً روزداروں کا کڑا امتحان ہے، اللہ اگر توفیق نہ دے ، انسان کے بس کا کام نہیں، اوپر سے بجلی کا بحران اور کراچی والوں کے لیے کے الیکٹرک کے عذاب جس پر جماعت اسلامی میدان عمل میں ہے لیکن باقی سیاسی جماعتیں کہاں ہیں؟کراچی میں موجود مہاجروں کے نام پر وجود میں آنے والی ایک سے زائد پارٹیاں مصروف عمل ہیں لیکن کے الیکٹرک ان کی نظروں سے اوجھل ہے،مصطفیٰ کمال ، فاروق ستار، میئر کراچی، آفاق احمد کو اور دوسرے زیادہ اہم مسائل درپیش ہیں، رہی پیپلز پارٹی تو وہ حکومت میں ہے، کے الیکٹرک کا ادارہ اس کا مسئلہ نہیں ہے،پانی، بجلی اور گیس کے حوالے سے اس کی محاذ آرائی وفاقی حکومت سے جاری ہے،اس معاملے میں ہمارے وزیراعلیٰ صاحب کا جوش و جذبہ قابل دید ہے،ان کی خدمت میں ہم پروفیسر سحر انصاری کا ایک نادر شعر پیش کرنے کی جسارت کر رہے ہیں
اے مہرِ تاب ناک تِری روشنی کی خیر
کچھ لوگ زیرِ سایہ ءدیوار جل گئے
اس تمہید کے بعد آئیے جون کی فلکیاتی صورت حال پر ایک نظر ڈال لی جائے۔
جون کے ستارے
بادشاہِ فلک سیارہ شمس برج جوزا میں حرکت کر رہا ہے، 21 جون کو آبی برج سرطان میں داخل ہوگا، منشی ¿ فلک عطارد برج ثور میں ہے، 7 جون کو اپنے ذاتی برج جوزا میں داخل ہوگا، تعلقات کا ستارہ زہرہ برج حمل میں ہے،6 جون کو اپنے ذاتی برج ثور میں داخل ہوگا، قوت و توانائی کا ستارہ مریخ برج جوزا میں حرکت کر رہا ہے، 4 جون کو اپنے برج ہبوط میں داخل ہوگا، یہاں اس کی پوزیشن انتہائی کمزور اور ناقص رہے گی، وسعت و ترقی کا سیارہ مشتری برج میزان میں بحالتِ رجعت حرکت کر رہا ہے،9 جون کو مستقیم ہوکر اپنی سیدھی چال پر آجائے گا اور پورا مہینہ برج میزان میں ہی حرکت کرے گا، سیارہ زحل برج قوس میں حرکت کر رہا ہے اور پورا مہینہ اسی برج میں رہے گا، ایجادات کا سیارہ یورینس برج حمل میں اور پراسرار نیپچون برج حوت میں حرکت کر رہے ہیں، نیپچون 16 جون سے رجعت میں آجائے گا، کایا پلٹ پلوٹو بحالت رجعت برج جدی میں حرکت کرے گا،راس اور ذنب بالترتیب برج اسد اور دلو میں حرکت کریں گے۔
نظرات و اثراتِ سیارگان
جون کے مہینے میں اہم سیارگان کے درمیان خاصے غیر معمولی زاویے قائم ہورہے ہیں، یہ زاویے سعد و نحس دونوں طرح کے اثرات رکھتے ہیں، اس مہینے میں تثلیث کے 6 اور تسدیس کے 4 زاویے سعد اثرات کے حامل ہوں گے جب کہ مقابلے کے دو اور تربیع کے چار نحس زاویے بنیں گے، 3 قرانات واقع ہوں گے، اہم نظرات کی تفصیل اور مختصر اثرات درج ذیل ہیں۔
یکم جون: زہرہ اور زحل کے درمیان تثلیث کا سعد زاویہ دوسروں سے تعلقات کے معاملے میں مثبت اثر رکھتا ہے،خصوصاً یہ وقت عورت و مرد کے درمیان ازدواجی بندھن یا تعلقات میں استحکام لانے کا سبب ہوگا، ملکی سطح پر خواتین کی فلاح و بہبود کے کاموں پر توجہ دی جائے گی، یہ وقت منگنی یا نکاح وغیرہ کے لیے موافق ثابت ہوتا ہے،اس دوران میں اہم کاموں کو خوش اسلوبی اور معاملہ فہمی سے نمٹانے میں آسانی ہوتی ہے۔
3 جون: زہرہ اور یورینس کے درمیان قران کا زاویہ سعد اثر رکھتا ہے، محبت کے معاملات میں چونکا دینے والے نتائج اور حیران کن صورت حال پیدا کرتا ہے،خواتین کے لیے یہ نظر بے حد مددگار ثابت ہوتی ہے، وہ غیر معمولی کارنامے یا کارکردگی کا مظاہرہ کرتی ہیں، ملکی اور بین الاقوامی مارکیٹوں میں یہ وقت ایسی الیکٹرونکس پروڈکٹس سامنے لاتا ہے جو خواتین کی ضروریات سے متعلق ہوں اور چونکا دینے والی ہوں۔
اسی تاریخ کو شمس اور مشتری کے درمیان تثلیث کا سعد زاویہ قائم ہوگا، یہ ملک میں قانون سازی کا رجحان لاتا ہے،نئے قوانین کی ضرورت محسوس کی جاتی ہیں، حکمران بہتر فیصلے کرتے ہیں، عام لوگوں کے لیے یہ زاویہ گورنمنٹ سے فوائد کی نشان دہی کرتا ہے،پروموشن اور ترقی کے مواقع لاتا ہے، کاروباری معاملات میں پوزیشن بہتر ہوتی ہے،اس وقت قرضے وغیرہ کا حصول آسان ہوسکتا ہے،لوگوں سے مالی نوعیت کے معاملات میں اہم معاہدات طے پاسکتے ہیں، خصوصاً گورنمنٹ سے۔
شمس اور مشتری کی نظر سال میں ایک بار قائم ہوتی ہے اور یہ سعد اکبر تصور کی جاتی ہے،اس وقت ماہرین جفر لوح خوش بختی تیار کرتے ہیں جو انعامی اسکیموں میں معاون و مددگار ثابت ہوتی ہے،برسوں پہلے 2007 میں ہم اس کی تیاری کا طریقہ عام کیا تھا، اس وقت سے فائدہ اٹھانے کے خواہش مند براہ راست رابطہ کرسکتے ہیں۔
4 جون: شمس اور نیپچون میں اسکوائر کا نحس زاویہ قائم ہوگا، یہ امراءو وزراءاور صاحب عہدہ و مرتبہ افراد کے لیے نحس اثر لاتا ہے،بعض لوگ تنزلی کا شکار ہوتے ہیں، عام لوگوں کو اس وقت گورنمنٹ سے متعلق اسکیموں میں حصہ لیتے ہوئے محتاط رہنا چاہیے، اس وقت شروع کیے گئے گورنمنٹ کے منصوبے پایہ ءتکمیل تک نہیں پہنچتے،جائیداد کی خریدوفروخت یا فلیٹ وغیرہ بک کرانے میں بھی محتاط رہنے کی ضرورت ہوگی،آپ کے ساتھ اعلیٰ درجے کا دھوکا یا فراڈ ہوسکتا ہے۔
9 جون: زہرہ اور مریخ کے درمیان تسدیس کا سعد زاویہ قائم ہوگا ، علم نجوم میں زہرہ کو عورت اور مریخ کو مرد تسلیم کیا گیا ہے،یہ سعد نظر دونوں کو قریب لانے میں معاون ہے، اس وقت روٹھے ہوئے کو منانے ، منگنی کرنے یا نکاح وغیرہ کے بارے میں فیصلہ کرنا چاہیے،اس کے علاوہ دیگر متنازع معاملات میں بھی یہ نظر معاون ہے،پرانے جھگڑے نمٹائے جاسکتے ہیں۔
زہرہ اور مریخ کی تسدیس عورت و مرد کے لیے محبت و تسخیر میں مددگار ہوتی ہے،اس وقت محبت و تسخیر کے عملیات و نقوش کرنا فائدہ مند ثابت ہوتا ہے۔
13 جون: عطارد اور مشتری کے درمیان تثلیث کا سعد زاویہ قائم ہوگا، ملکی سطح پر یہ نظر میڈیا ، بینکنگ سیکٹر اور مالی امور میں مددگار ہے،میڈیا سے تعلق رکھنے والے افراد اس وقت سے فائدہ اٹھاسکتے ہیں، مزید یہ کہ بینک اور اسٹاک مارکیٹ کے ذریعے بھی فوائد حاصل ہوسکتے ہیں، بزنس کو بڑھانے اور نئے امکانات پیدا کرنے کے لیے سعد و مبارک وقت ہوگا، بیرون ملک سفر ، تعلیمی سرگرمیاں بھی اس دوران میں بہتر رہیں گے،ایسے کام جن میں عقل و دانش کی ضرورت ہوتی ہے ، اس وقت بہتر طور پر انجام دیے جاسکتے ہیں۔
14 جون: عطارد اور نیپچون کے درمیان تربیع کی نحس نظر نہایت پُرفریب اور اور فراڈی ثابت ہوسکتی ہے،ہوشیار باش ! نیپچون کے ساتھ عطاردی اثرات مکاری ، چال بازی، دھوکا و فریب لاتے ہیں، اس تاریخ کے آس پاس کسی معاہدے پر دستخط کرنے سے پہلے یا کسی لین دین میں پڑنے سے پہلے اچھی طرح اطمینان کرلیں کہ آپ کے ساتھ کوئی غلط ڈیل تو نہیں ہورہی، ایسے لوگوں سے محتاط رہیں جن کی شہرت اچھی نہیں ہے اور جن کا کردار ماضی میں بھی مشکوک رہا ہے،ان کی باتوں میں نہ آئیں، البتہ اس وقت میں کسی مشکل صورت حال سے نکلنے کے لیے معقول حیلے بہانے سوچے جاسکتے ہیں اور ان پر عمل بھی کیا جاسکتا ہے۔
16جون: 14 جون سے عطارد اور نیپچون کی نظر کے ساتھ ہی ایک نہایت نحس اور سخت وقت کا آغاز ہورہا ہے،16 جون کو شمس اور زحل کے درمیان مقابلے کی نظر ہوگی جب کہ 17 کو عطارد اور زحل کے درمیان مقابلہ ہوگا لہٰذا ان تاریخوں سے چند روز پیشتر اور چند روز بعد تک محتاط رہیں، اہم کاموں کو روک دیں، روز مرہ کی مصروفیات جاری رکھیں، اگر لوگ دباو ¿ ڈال کر یا لالچ دے کر کوئی کام کرانا چاہیں تو اس سے گریز کریں، ملکی سطح پر ایسے اقدام یا فیصلے سامنے آسکتے ہیں جو عوام کے لیے پریشانی اور تکلیف کا باعث ہوں، خصوصاً متوسط طبقہ اور مزدور پیشہ افراد حکومت کے غلط فیصلوں اور اقدام سے متاثر ہوں گے۔
17 جون: عطارد اور زحل کے درمیان مقابلہ ایک نحس نظر ہے،پرنٹ میڈیا ، الیکٹرونکس میڈیا اور سوشل میڈیا اضطراب اور بے چینی کا شکار ہوسکتا ہے، خاص طور پر ورکنگ جرنلسٹ وغیرہ انہیں اپنے حقوق کے حصول میں دشواریاں پیش آسکتی ہیں، اس وقت بہت سی افواہیں اور غلط خبریں بھی عام ہوسکتی ہیں، اہم اور طویل المدت معاہدات سے گریز کیا جائے،پراپرٹی کی خریدوفروخت یا ٹرانسفر وغیرہ کے معاملات میں بھی دشواریاں پیدا ہوں گی۔
18 جون: شمس اور یورینس کے درمیان تسدیس کا سعد زاویہ حکومتی معاملات میں چونکا دینے والے اقدام اور فیصلوں کی نشان دہی کرتا ہے جو مثبت ہوسکتے ہیں، یہ وقت عام لوگوں کے لیے نئے مواقع لاتا ہے،خصوصاًگورنمنٹ سے متعلق کام حیرت انگیز طور پر انجام پاجاتے ہیں، نئے انکشافات اور نئی حیران کن معلومات حاصل ہوتی ہیں، بعض اہم معاملات میں کوئی چونکا دینے والا ٹرننگ پوائنٹ سامنے آتا ہے۔
20 جون: زہرہ اور نیپچون کے درمیان تسدیس کا زاویہ جذباتی اور رومانی دلچسپیاں پیدا کرتا ہے،خواتین مثبت اور معاون رویے کا اظہار کرتی ہیں لیکن اس وقت جذبات پر قابو رکھ کر قدم اٹھانا چاہیے،آنکھیں بند کرکے فیصلے نہ کیے جائیں، یہ وقت رومانی تفریحات کے لیے موزوں اور موافق ہوتا ہے۔
اسی تاریخ کو عطارد اور یورینس کے درمیان بھی تسدیس کی نظر ہوگی،نئے انکشافات ، نئی معلومات اور نئے آئیڈیاز ذہن میں آسکتے ہیں جن سے فائدہ اٹھایا جاسکتا ہے،بعض ایسے کام اس وقت میں ہوجاتے ہیں جن کی طرف سے ہم مایوس ہوچکے ہوں، اچانک سفر درپیش ہوسکتا ہے،سفر سے متعلق رکے ہوئے کام انجام پاجاتے ہیں۔
21 جون: عطارد اور شمس کا قران ایک ایسی نظر ہے جو بعض لوگوں کے لیے سعد اثر دیتی ہے اور بعض کے لیے نحس، گویا ایک مشکوک اثر رکھنے والی نظر ہے، اس وقت دوسروں کی باتوں پر آنکھیں بند کرکے بھروسا نہ کریں، پہلے اپنے طور پر اچھی طرح تحقیق اور تصدیق ضرور کریں، یہ وقت بھی تحریری کاموں میں غلطیاں لاتا ہے، اس وقت اہم دستاویزات یا معاہدات پر دستخط نہ کریں۔
24 جون: زہرہ اور پلوٹو کے درمیان تسدیس کا زاویہ رومانی معاملات میں شدت پسندی لاتا ہے،آپ کو اپنی مرضی کے خلاف کسی کام پر آمادہ کرنے کے لیے دباو ¿ آسکتا ہے،یہ دباو ¿ خواتین کی طرف سے بھی ہوسکتا ہے اور حضرات کی طرف سے بھی، اس وقت بعض ایسے فیصلے ہوجاتے ہیں جو پہلے نہیں ہورہے تھے اور کسی وجہ سے تاخیر کا شکار تھے۔
25 جون: مریخ اور مشتری کے درمیان تربیع کا نحس زاویہ قائم ہوگا، مشینری اور مالی امور سے متعلق معاملات متاثر ہوں گے، اس وقت مشینری کی خریدوفروخت میں محتاط رہنے کی ضرورت ہوگی،ٹیکنیکل نوعیت کے کاموں میں دشواری پیش آئے گی، اخراجات زیادہ ہوں گے یا کوئی مالی نقصان ہوسکتا ہے،ملکی سطح پر قانون شکنی کے واقعات میں اضافہ ہوتا ہے۔
26 جون: مریخ اور نیپچون کے درمیان تثلیث کی سعد نظر ہوگی،یہ نظر ٹیکنیکل نوعیت کے کاموں میں معاون و مددگار ہے،نئے راستے دریافت کرنے کے لیے غورو فکر کرنا چاہیے، بہت سے پیچیدہ مسئلے اس وقت میں حل ہوسکتے ہیں۔
27 جون: عطارد اور مشتری کے درمیان تربیع کی نحس نظر کاموں میں رکاوٹ لاتی ہے، خصوصاً سفر اور تعلیمی سرگرمیاں متاثر ہوتی ہیں، کاروباری گفت و شنید یا کوئی نئی ڈیل اس دوران میں متاثر ہوسکتی ہے،اسٹاک مارکیٹ میں اُتار چڑھاو ¿ پیدا ہوتا ہے۔
28 جون: عطارد اور نیپچون کے درمیان تثلیث کا سعد زاویہ میڈیا اور ورکنگ جرنلسٹ کے لیے معاون و مددگار ثابت ہوگا لیکن اس وقت ہونے والی تبدیلیاں پائیدار اور مستحکم نہیں ہوں گی، جاب تبدیل کرنے والے افراد کو سوچ سمجھ کر فیصلے کرنے چاہئیں، ممکن ہے دور کے ڈھول سہانے نظر آئیں۔
29 جون: عطارد اور مریخ کے درمیان قران کا زاویہ سعد اثر رکھتا ہے،اس وقت ٹرانسپورٹ یا ٹیکنیکل نوعیت کے کاموں میں کامیابی ملتی ہے، مشینری کی خریدوفروخت فائدہ بخش ثابت ہوتی ہے،میڈیا میں زیادہ جوش و جذبہ اور بعض صورتوں میں احتجاجی لہر پیدا ہوتی ہے،دوران سفر تیز ڈرائیونگ سے گریز کرنا چاہیے۔
قمر در عقرب
چاند جب آٹھویں برج عقرب میں داخل ہوتا ہے تو 3 ڈگری پر اسے ہبوط ہوتا ہے یعنی اس کی پوزیشن انتہائی ناقص اور کمزور ہوجاتی ہے،قمر در عقرب کا وقت نہایت منحوس تصور کیا جاتا ہے، اس ماہ پاکستان اسٹینڈرڈ ٹائم کے مطابق 5 جون کو قمر 03:45 pm پر برج عقرب میں داخل ہوگا اور جمعرات 8 جون کو صبح 03:59 am تک اسی برج میں رہے گا، عام طور پر اس تمام وقت کو نحس تصور کیا جاتا ہے لیکن خصوصی طور پر جب قمر 3 درجے پر آتا ہے تو ایک خاص قسم کی تاثیر پیدا ہوتی ہے، اس خاص وقت کی ابتدا 5 جون کو شام 07:44 pm سے ہوگی اور 07:53 pm تک قمر ہبوط کے درجے پر ہوگا۔
اس وقت میں علاج معالجہ کرانا فائدہ مند ہوتا ہے، اس کے علاوہ دیگر اہم کام یا نئے کام شروع کرنا نامناسب ہوگا، البتہ بری عادتوں یا برے کاموں سے روکنے کے لیے ضروری عملیات یا نقوش کیے جاسکتے ہیں، ہم مختلف اوقات میں ایسے نقوش یا عمل دیتے رہے ہیں، اس بار ایک سخت قسم کا عمل دیا جارہا ہے اور تاکید ہے کہ ہر گز کسی ناجائز مقصد سے نہ کیا جائے ورنہ نقصان اٹھانا پڑے گا۔
اکثر یہ شکایت عام ہے کہ لوگ خصوصاً لڑکے لڑکیاں ناجائز تعلقات میں ملوث ہوجاتے ہیں جس کی وجہ سے والدین پریشان ہوتے ہیں یا اکثر کیسوں میں شوہر یا بیوی بے وفائی کرتے ہیں اور غیر عورت یا مرد سے ناجائز مراسم قائم کرلیتے ہیں، ان پر کسی کے سمجھانے بجھانے کا بھی اثر نہیں ہوتا، ایسی صورتوں میں اکثر گھرانے تباہ ہوجاتے ہیں، اسے روکنے کے لیے بندش کا ایک سخت عمل یہاں تحریر کیا جارہا ہے۔
قمر در عقرب کے وقت میں ایک لوہے کا تالا پہلے سے مہیا کرلیں، خیال رہے کہ تالا استعمال شدہ نہ ہو، نیا ہو، اس کے بعد باوضو ہوکر کسی کاغذ پر مندرجہ ذیل تحریر لکھیں۔
یا قاھر ذوالبطش الشدید انت الذی لا یطاق انتقامہ
اس کے نیچے اگر مرد کو کسی خاص عورت سے روکنا ہو تو ایک سطر اور لکھیں ”بستم ذکر فلاں بن فلاں برفرج فلاں بنت فلاں۔
پہلی مرتبہ مرد کا نام مع والدہ لکھیں اور دوسری مرتبہ اس عورت کا نام مع والدہ جس سے ناجائز تعلق ہو، اس کے بعد کاغذ کو لپیٹ کر تالے میں چابی کے سوراخ کی جگہ ڈال دیں اور تالا بندکردیں، اوپر موم لگاکر منہ بند کردیں، اب مندرجہ بالا آیت شریف 1000 مرتبہ پڑھ کر تالے پر دم کردیں، تالے کو کسی سیاہ کپڑے یا چمڑے میں اچھی طرح لپیٹ کر کسی کنویں یا تالاب میں ڈال دیں، وہ مرد اس عورت سے ناجائز تعلق قائم نہیں کرسکے گا اور جب تک پانی میں سے تالا نکال کر کھولا نہیں جائے گا، بندش قائم رہے گی، یہ کام کرنے کے بعد حسب توفیق صدقہ و خیرات کریں۔
یہی عمل کسی فاحشہ اور زانیہ عورت کے لیے بھی کیا جاسکتا ہے تاکہ وہ بدکاری سے باز رہے،اس صورت میں آیت کے نیچے صرف اتنا لکھنا کافی ہوگا ”بستم فرج فلاں بن فلاں ہر غیر مرد (عورت کا نام مع والدہ) فلاں بن فلاں کی جگہ لکھا جائے گا، ایک بار پھر تاکید ہے کہ اس عمل کو صرف تجربے کے طور پر یا ناجائز امور میں ہر گز نہ کریں ورنہ نقصان کے ذمے دار ہوں گے۔
شرف قمر
برج ثور میں قمر کو شرف کی قوت حاصل ہوتی ہے،اس وقت کو نہایت سعد تصور کیا جاتا ہے،اس ماہ پاکستان اسٹینڈرڈ ٹائم کے مطابق شرف قمر 20 جون 06:13 am سے 07:53 am تک ہوگا، اس وقت رزق و روزگار میں بہتری کے لیے یا باہمی محبت و اتحاد کے لیے عمل کرنا چاہیے، شرف قمر کے حوالے سے بھی ہم برسوں سے مختلف ضرورتوں کے تحت عملیات لکھتے رہتے ہیں، اس بار شرف قمر رمضان کے مبارک مہینے میں ہوگا، شرف کا وقت زیادہ نہیں ہوتا لہٰذا اسمائے الٰہی یا رحمن یا رحیم 556 مرتبہ پڑھ کر اپنے نیک مقاصد کے لیے دعا کریں۔
کوئی تبصرے نہیں:
ایک تبصرہ شائع کریں